Երկու ամիս է` հազվադեպ եմ ուղիղ եթերում լինում, հանրապետականը ուղիղ եթերից դուրս չի գալիս. Փաշինյան
Վարչապետի պաշտոնակատար Նիկոլ Փաշինյանը նոյեմբերի 20-ին լրագրողների հետ հանդիպմանը կրկին անդրադարձավ վերջին օրերին ակտիվորեն քննարկվող ֆիզիկական անձանց եկամուտների համատարած հայտարարագրման գաղափարին: Փաշինյանն ընդգծեց` չի կարող լինել այնպես, որ մարդը Հայաստան մտնելիս հարկվի, հետո գնա իր բնակավայր, հարկվի, հետո տնից դուրս գա, հարկվի, հետո մի տեղ գնա, էլի հարկվի: Վարչապետի պաշտոնակատարի խոսքով` նման համակարգ չկա Հայաստանում և չի էլ կարող լինել:
Փաշինյանին նաև զայրացրեց նաև արտագնա աշխատանքի մեկնածներին տրվող «խոպանչի» անունը:
«Էդ ի՞նչ բառ է` «խոպանչի», այսինքն` մենք չենք նկատում, էս երկու օր է` այդ բառը բոլորը ի պաշտպանություն օգտագործում են, նախ՝ այդ մարդկանց, խնդրո՛ւմ եմ, արժանապատիվ անուն տվեք, հետո ՊԵԿ-ը պաշտոնապես հայտարարել է, որ նման նախագիծ ու հայեցակարգ չկա, մենք ասել ենք, որ մեր երկրում հաստատված է ուղիղ ժողովրդավար կառավարություն, չի կարող որևէ փոփոխություն, հարկային բեռի ավելացում լինել առանց ժողովրդի համաձայնության, քաջալերանքի ու մանդատի: Հարաբերությունների այս ձևը մոռանանք, որ կառավարությունն ասում է՝ այսպես է ու վերջ: Հանրապետականները էս երկու օր է` ուղիղ եթերից դուրս չեն գալիս, ես էս երկու ամիս է` հազվադեպ եմ ուղիղ եթերում լինում, իրենք որոշել են ակտիվանալ, բայց ես կվերադառնամ, մի՛ անհանգստացեք»,- ասաց նա:
Փաշինյանը հայտնեց, որ Հայաստանը մի շարք երկրների հետ կրկնակի հարկումը բացառող պայմանագրեր ունի, ՊԵԿ բարձրաձայնած այդ գաղափարը դեռ թղթի վրա է, երբ որևէ բան լինի, կքննարկվի, կորոշեն` ճի՞շտ մոտեցում է, թե՞ սխալ:
Վարչապետի պաշտոնակատարը հայտնեց, որ հատկապես այս նախընտրական շրջանում երբեմն զգում է` փորձագիտական որոշ շրջանակներ ուզում են այսպիսի տրամաբանություն առաջ քաշել` ոչ ոք պիտի հարկ չվճարի, բոլորը պետք է պակաս հարկեր վճարեն, նույնիսկ ստվերը օգտակար է տնտեսության համար, բայց նաև պետք է թոշակներ ավելացնեն, ռազմական ծախսերը, փողոցները պիտի լինեն կատարյալ վիճակում: