Ադրբեջանում հայտնված Կարեն Ղազարյանի հարազատների կողմից մայրուղին փակելն ո՞ւմ դեմ էր ուղղված․ Փաշինյան

Հայաստանի վարչապետի կինը երկու անգամ այցելել է անհայտ պայմաններում Ադրբեջանում հայտնված Կարեն Ղազարյանի ընտանիքին, իսկ ինքը՝ վարչապետի պաշտոնակատարը, ծանոթ է խնդրին, ու հանձնարարել է հանդիպում կազմակերպել այդ ընտանիքի հետ։ Այս մասին այսօր հայտարարեց Նիկոլ Փաշինյանը։

Նրա խոսքով, սակայն, Ղազարյանի հարազատների կողմից միջպետական ճանապարհը փակելը հարցեր է առաջացնում։

«Ո՞ւմ դեմ էր ուղղված այդ ակցիան, ո՞ւմ դեմ։ Եթե դա Ադրբեջանի իշխանության գործողությունների դեմ էր, ինչո՞ւ է այդ դեպքում փակվում այն ճանապարհը, որի ընդհանրապես փակումը Ադրբեջանի ստրատեգիական նպատակներից մեկն էր։ Եթե այդ ակցիան մեր դեմ էր՝ նրա համար, որ մենք բավարար ուշադրություն չենք դարձնում խնդրին, այդ դեպքում հարց է ծագում՝ ինչո՞ւ է վարչապետի կինը երկու անգամ այցելում ընտանիքին, և արդյո՞ք մենք ունենք այդպիսի նախադեպ, երբ այդ իրավիճակում հայտնված ընտանիքն այսպիսի ուշադրության է արժանանում», – ասաց Փաշինյանը։

Սակայն հարցեր էլի կան՝ եթե այդ ակցիան ուղղված էր նրան, որ Հայաստանը ջանքեր գործադրի Ղազարյանին վերադարձնելու կամ նրան փոխանակելու ուղղությամբ, հարց է ծագում՝ արդյո՞ք այդ պրոցեսը պետք է համապատասխանի Հայաստանի շահերին, թե՞ պետք է ամեն գնով հետ բերել նրան։

«Մենք մի հատ էլ այդպիսի իրավիճակում գտնվող տղա ունենք, որը գտնվում է գերության մեջ։ Իսկ ինչո՞ւ նրա համար ճանապարհներ չեն փակում, որովհետև նա որբանոցի երեխա՞ է, դրա համա՞ր։ Մենք այս տրամաբանությա՞մբ ենք առաջնորդվում», – հարցադրումներ արեց Փաշինյանը։