ՀՀ-ն աղբի մեջ կորած է. Նիկոլ Փաշինյան

Հայաստանի վարչապետի պաշտոնակատար Նիկոլ Փաշինյանը, ով այս պահին գտնվում է Մարտունիում, ամեն անգամ մարզեր գնալիս, իր խոսքով, սրտի մեծ ցավ է զգում։ Նա իր ելույթում հայտարարեց, որ այսօր էլ ամբողջ ճանապարհին նայել է մեքենայի պատուհանից և նկատել, որ ՀՀ- ն աղբի մեջ կորած է։

«Մեր սրբազան հայրենիքն աղբի մեջ կորած է։ Ցավ եմ ապրում, քանի որ այսօր առավոտից պատուհանից նայում եմ ու շատ մեծ քանակությամբ աղբ եմ տեսնում։ Այս խնդիրը պետք է լուծվի Կառավարության ու քաղաքացու համատեղ պատասխանատվությամբ։ Այո՛, կառավարությունը, այո՛, ՏԻՄ-ը պետք է լուծեն աղբահավաքման խնդիրը։ Այսօր ՀՀ-ում ամենամեծ խնդիրը Հայաստանում աղբի վերամշակման գործարան ստեղծելն է, որ աղբը տեղից տեղ չտեղափոխվի»,- ասաց Փաշինյանը։

Վարչապետի պաշտոնակատարը նկատեց, որ իր ասածը կարող է պարզունակ թվալ, սակայն, ըստ նրա, եթե յուրաքանչյուրն իր շրջապատը պահի, ոչ միայն մաքրի, այլև պարզապես չաղտոտի, ապա երկրում փոփոխություն կլինի։ Նրա կարծիքով՝ ՀՀ-ում ծխողների 95 տոկոսը քնթուկը գցում է գետնին։

«Որպես հին ծխող՝ բոլորիս կոչ եմ անում, որ թողնենք ծխելը, ես 2004 թ. թողել եմ, դա էլ այն պարագայում, երբ նախկինում օրական 3 տուփ ծխախոտ էի ծխում։ Ես ձեզանից մեկն եմ, ես էլ եմ ժամանակին որոշ դեպքերում ծխել ու գցել գետնին, բայց ինչ-որ X պահի հասկացել եմ, որ սխալ եմ անում ու դադարեցրել եմ։ Հեղափոխությունը սկսվում է այստեղից, քանի որ հեղափոխությունը մեզանից յուրաքանչյուրի փոփոխությունն է, որովհետև մենք փոխվեցինք, դրա համար եղավ»,- ընդգծեց Նիկոլ Փաշինյանը։

Նիկոլ Փաշինյանը կարծում է, որ նախկինում հեղափոխություն չէր լինում, քանի որ մարդիկ վախենում էին պարտվելուց, քմծիծաղի արժանանալուց, հետապնդվելուց և այլն, սակայն ՀՀ քաղաքացին հաղթեց այն ժամանակ, երբ դադարեց վախենալուց։

Միևնույն ժամանակ նա շեշտեց, որ իշխանության փոփոխությունը բավարար չէ։ Նրա խոսքով՝ երկրում շատ բան փոխվել է, բայց դեռ փոխելու ավելի շատ բաներ կան։

«Յուրաքանչյուր փոփոխություն սկսվում է մեր փոփոխությունից։ Այսօր, երբ հասա Նորատուսի խաչմերուկ, թեև մի ակնթարթ տևեց, բայց սարսափեցի, որովհետև այնտեղ 2 հսկայական խանութ կա, իսկ այդ խանութից 10 մետր այն կողմ այդ խանութների չափ աղբակույտ կա։ Այնպիսի տպավորություն է, որ այդտեղ գյուղապետ չկա, խանութի սեփականատեր չկա։ Ո՞ւր է նայում մարզպետարանը, այնպիսի տպավորություն է, որ այս երկում ոչ մի բան չի փոխվել, որովհետև այդ թափված աղբն անարգանք է մեզանից յուրաքանչյուրի նկատմամբ։ Հիմա շատ լուրջ զբաղվելու եմ այն մարդկանցով, ում պատասխանատվությունն է այդ աղբը հավաքելը, քանի որ մեզ ուզում են սովորեցնել աղբի մեջ ապրել։ Մեզ ցանկանում էին սովորեցնել քաղաքական աղբի մեջ ապրել, մենք մաքրեցինք, իսկ հիմա ֆիզիկական, մտավոր, բարոյական ու հուսախաբության աղբը պետք է մաքրվի»,- շարունակեց Նիկոլ Փաշինյանը։

Վարչապետի պաշտոնակատարը հայտարարեց, թե որևէ տեսակի աղբ ՀՀ քաղաքացին չպետք է հանդուրժի, քանի որ հայը այն ժողովուրդն է, որն աշխարհի չեմպիոն, ռեկորդակիր Սիմոն Մարտիրոսյան ունի, Յուրի Վարդանյան ունի, այսինքն՝ ժողովուրդ ենք, որ հերոսներ է ունեցել և ունի։

«Մեզ անընդհատ փորձում են համոզել, որ մենք փոքր ժողովուրդ ենք, խեղճ ժողովուրդ եք, որ յոլա գնացող ժողովուրդ ենք, ասում են՝ դե լավ, յոլա գնացեք։ Ասում են՝ յոլա գնացեք, էլի, պուճուր ժողովուրդ եք, որ այսքան էլ կաք․․․ ձեր հայրենիքի էս մի մասը տվեք, էն մի մասը տվեք, բայց մենք բոլորին ասում են՝ ո´չ, մենք փոքր ժողովուրդ չենք։ Մենք, կարող է, փոքրաթիվ ժողովուրդ ենք, բայց մենք մեծ ժողովուրդ ենք։ Հեղափոխության իմաստն հենց այն է, որ ինքներս մեզ ու աշխարհին ապացուցել ենք, որ մենք մեծ ժողովուրդ ենք, որովհետև արել ենք մի բան, որ աշխարհում մեզանից առաջ ոչ մեկն ի վիճակի չի եղել անելու»,- հավելեց Նիկոլ Փաշինյանը։