Շարմազանովը վստահ է՝ ՀՀԿ համամասնական ցուցակում բոլորն ազգային–ավանդական արժեքների կրող են
ՀՀԿ խոսնակ, 6-րդ գումարման ԱԺ ՀՀԿ–ական փոխնախագահ Էդուարդ Շարմազանովը անդրադարձել է հարցին, թե արդյոք տրամաբանական է այն, որ ինքը, լինելով երկար տարիների կուսակցական, ՀՀԿ համամասնական ցուցակի 6-րդ համարն է, իսկ Դավիթ Շահնազարյանը՝ երրորդ։
Այսօր՝ նոյեմբերի 16-ին, ԱԺ–ում լրագրողների հետ զրույցում Շարմազանովը հավաստիացրեց՝ իրենք կուսակցամոլությամբ չեն տառապում. «Ես անձամբ շատ գոհ եմ, որ Շահնազարյան Դավիթը մեր ցուցակի երրորդ համարն է: Շահնազարյանն այն անձնավորությունն է, որը 88-ից սկսած եղել է ղարաբաղյան շարժման հիմնադիրներից մեկը, արցախյան պայքարում ունի ինստիտուցիոնալ հիշողություն, մարդ է, որի համար ազգային արժեքներն ու արցախյան հիմնահարցում հայանպաստ լուծումը գերխնդիր է եւ շատ կարեւոր է Դավիթ Շահնազարյանի խոսքը հասցնել մեր հանրությանը»։
Շարմազանովը վստահ է՝ ՀՀԿ համամասնական ցուցակում բոլորն ազգային–ավանդական արժեքների կրող են:
Լրագրողները հետաքրքրվեցին՝ եթե ՀՀԿ ցուցակում ընդգրկված Մենուա Հարությունյանը ՀՀԿ-ի կենտրոնական հարձակվողն է, ապա դարպասապահն ո՞վ է, ո՞վ պետք է ՀՀԿ դարպասը պաշտպանի հարվածներից, որին ի պատասխան Շարմազանովն ասաց. «Ես կարծում եմ, որ հարվածներ կստանա ոչ թե ՀՀԿ–ն, այլ այսօրվա իշխանությունը, որը 6 ամսվա ընթացքում ունեցել է բազմաթիվ բացթողումներ։ Ընդդիմությունն է հարցեր տալիս, ոչ թե ընդդիմությունն է հարցերին պատասխանում: Մենք պատրաստվում ենք լիքը հարցեր տալ ու կլսենք իշխանության պատասխանները»։
Պատգամավորը շեշտում է՝ ՀՀԿ–ն պատրաստվում է վեր հանել այն ստերի, խաբեության շարանը, որն արել է այսօրվա իշխանությունը. «Չգիտենք հարձակվող ենք, պաշտպան ենք, թե կիսապաշտպան, բայց պատրաստվում ենք պաշտպանել ազգային արժեքային համակարգը եւ վեր հանել այն բացասականը, այն ստերի, խաբեության շարանը, որն արել է այսօրվա իշխանությունը՝ մինչեւ իշխանության գալը»:
Շարմազանբովը, սակայն, բացառում է՝ ո՛չ ինքը, ո՛չ էլ ՀՀԿ–ն չեն պատրաստվում պահեստային դառնալ. «Ես երբեք պահեստային չեմ դառնա, ՀՀԿ-ն եւս»: