Քաղաքացին, որ հեղափոխություն է արել, ծուռվիզ կանգնել չի կարող. Փաշինյան

Հանրապետությունում առաջնային հարկ վճարողի կարգավիճակ ունի մոտ 350 հազար մարդ: Այս մասին խորհրդարանում հայտարարեց ՀՀ վարչապետի պաշտոնակատար Նիկոլ Փաշինյանը: Նա հստակեցրեց, թե ում նկատի ունի առաջնային հարկ վճարող ասելով. բոլոր այն մարդկանց, ովքեր աշխատում են մասնավոր ընկերություններում:

«Ինչո՞ւ ենք այսպես նկատի ունենում. մասնավոր կամ ոչ բյուջետային ընկերություններում, ըստ էության, այս 350 հազար մարդիկ են, ովքեր հարկեր են վճարում` դրանք զրոյից ստեղծելով: Իհարկե, պետական կառավարման համակարգն էլ, ԱԺ պատգամավորները ևս հարկ վճարում են, բայց նրանց աշխատավարձը ձևավորվում է այս 350 հազար հարկ վճարողների կատարած վճարների ձևավորումից: Մեր խնդիրն է վարել այնպիսի քաղաքականություն, որ այս առաջնային հարկ վճարողների թիվը եռապատկվի, քառապատկվի, որովհետև այս 350 հազար մարդիկ որպես հարկ վճարողներ իրենց ուսերին են, ըստ էության, կրում ողջ պետական համակարգի անվտանգության, ճանապարհների որակի, ենթակառուցվածքների, կրթության ֆինանսավորման պատասխանատվությունը»,- ասաց նա:

Փաշինյանի խոսքով` արձանագրելով, որ ՀՀ-ում բնակվող քաղաքացիների, ընտրողների կամ աշխատունակ քաղաքացիների ընդամենը փոքր տոկոսն է այսպիսի գործառույթ կատարում, ճշգրիտ ձևակերպում են այն խնդիրը, որ պետք է լուծել, այն է` նրանց կրկնապատկման, քառապատկման – հնգապատկման խնդիրը: Կառավարության ղեկավարն ասաց, որ իրենք որևէ մեկին չեն մեղադրում չաշխատելու, հարկ չվճարելու մեջ, ասում են` եղել է այլ իրավիճակ, երբ խրախուսվել է աղքատությունը, որ ամեն ընտրությունից առաջ հնարավոր լինի փողի ծախսմամբ հասնել ընտրությունների արդյունքների, սակայն իրենք բացել են և բացելու ենք բոլոր հնարավորությունները:

«Սա արդեն քաղաքական իրողություն է, մեր տնտեսական քաղաքականությունն ուղղված է լինելու անհատական ջանքը խրախուսելուն: Ամենազարմանալի մեղադրանքը, որ կարող են հնչեցնել, այն է, որ մենք պաշտպանում ենք օլիգարխիայի կամ խոշոր բիզնեսի շահերը: Այս մեղադրանքն առաջին անգամ հնչել է, երբ մարզերից մեկում քաղաքացիների հետ շփման ժամանակ ասացի, որ ճանապարհներից մեկը ոչխար պահելն է, սա հետաքրքիր մեղադրանքների տեղիք տվեց, որ վարչապետը գյուղացուն խորհուրդ է տալիս ոչխար պահել. աբսուրդ, պատկերացնո՞ւմ եք, վարչապետը գյուղացուն խորհուրդ է տալիս ոչխար պահել:

Բա ի՞նչ պիտի աներ վարչապետը, պիտի ասեր` գնա, այ ախպեր, ձեր մարզի դեպուտատի դռան դեմը վիզդ ծուռ կանգնի, մի օր 3000 դրամ կտա, մի օր՝ 5000: Սա այն է, ինչով երկար տարիներ փորձ են արել պայմաններ ստեղծել, որ մարդը այլ հնարավորություն չունենա, ՀՀ քաղաքացին, որ հեղափոխություն է արել, այդպես ծուռվիզ կանգնել չի կարող: Նա իր բարեկեցությունը և երկրի բարեկեցությունն ապահովելու հնարավորություն պետք է ունենա»,- ասաց Փաշինյանը: