Մեղադրում ենք ոչ թե ժողովրդին այլ նախորդ քաղաքական համակարգին. Փաշինյանն արձագանքեց քննադատություններին

Կառավարության կարևոր որոշումներից է մասնավոր տաքսիներին արտոնագրային վճարից ազատելը: Այս մասին խորհրդարանում հայտարարեց ՀՀ վարչապետի պաշտոնակատար Նիկոլ Փաշինյանը: Նա ընդգծեց` խոսքը ոչ թե ընդհանրապես բոլոր տաքսիների մասին է, այլ անհատ տաքսիստների:

«Նրանք որևէ վճար տալու անհրաժեշտություն չունեն, մարդիկ կարող են աշխատել, գործունեության այդ տեսակն իրականացնել առանց վճարելու, առանց լիցենզիա: Տարբեր հաշվարկներ կան… դա էլ տարօրինակություններից մեկն է, որ մենք հստակ չգիտենք` քանի հոգի է այդ գործունեությամբ զբաղվում: Փորձագիտական գնահատականներով՝ այդ գործունեությամբ զբաղվում է մոտ 50 հազար մարդ, այսինքն` կստացվի, որ մենք նրանց աշխատավարձն ամեն ամիս ավելացնում ենք 12 հազար դրամով, իսկ մարզերում` 8 000 դրամով: Երբ մենք ներկայացնում ենք մեր քաղաքականության բացատրությունները, դրանք տարօրինակ և հետաքրքիր արձագանքների են արժանանում»,- ասաց նա:

Փաշինյանն արձագանքեց վերջին օրերին իրենց հասցեին հնչող քննադատություններին, թե ժողովրդին մեղադրում են ծուլության և չաշխատելու մեջ: Նա հիշեցրեց` վարչապետ ընտրվելուց հետո նա տասնյակ անգամներ ասել է այդ մասին, ապա նշեց.

«Մենք մեր ժողովրդին ոչ մի բանում չենք մեղադրում, մեղադրում ենք նախորդ քաղաքական համակարգին, որ աշխատանքը խրախուսելու փոխարեն խրախուսել են աղքատությունը, որովհետև մարդուն ասել են` դու աղքատ ես, աղքատության նպաստ ես ստանում, ավելի լավ է` մի աշխատի, թե չէ նպաստից կզրկվես: Հարցն այն է, թե ինչու ենք մենք աշխատունակ մարդուն նպաստ տալիս, մենք ավելի թիրախային պետք է այդ աջակցությունը տրամադրենք, օրինակ` երեխային, այսինքն` նպաստառուն ոչ թե պետք է երեխայի աշխատունակ հայրը լինի, որն աշխատելու պարագայում կզրկվի այդ նպաստից, այլ՝ երեխան: Մենք պետք է չդնենք պայման` եթե քո հայրը աշխատի, կզրկենք օգնությունից, չի աշխատի` կտանք: Մենք ասում ենք, որ պետք է այդ օգնությունը տալ հասցեական` թոշակառուին, անաշխատունակ մարդուն, երեխային, որ իսկապես օգնենք այդ ընտանիքին, ոչ թե դատապարտենք մշտական աղքատության»,- ասաց նա: