Ջրային ռեսուրսների կառավարման համար ԵՄ–ն Հայաստանին կտրամադրի 1 մլն եվրո

Ջրային ռեսուրսների կառավարման՝ տեխնիկական վերազինման և մոնիթորինգի համակարգի կատարելագործման, 2 համաձայնագիր են ստորագրել ՀՀ բնապահպանության նախարարությունն ու եվրոպական գործակալությունները։ Այս մասին հայտնում են ՀՀ բնապահպանության նախարարության լրատվական ծառայությունից։

Բնապահպանության նախարարի և, ի դեմս Ավստրիայի շրջակա միջավայրի գործակալության, ԵՄ անդամ երկրների կոնսորցիումի ղեկավար Մայքլ Սուտերի ստորագրած համաձայնագրով կգնվեն լաբորատոր և մոնիթորինգի սարքավորումներ, համապատասխան վերապատրաստում կիրականացվի և լաբորատորիայի նոր մասնաշենքի վերանորոգում:

Ողջ ծրագրի համար Հայաստանին նախատեսված է տրամադրել 1 մլն եվրո, որի շրջանակներում ենթակառուցվածքների բարելավման և սարքավորումների տրամադրման ընդհանուր բյուջեն կազմում է շուրջ 600,000 եվրո։

Ֆրանսիայի «Արտուա-Պիկարդի» ջրային գործակալության և Բնապահպանության նախարարության աշխատակազմի Ջրային ռեսուրսների կառավարման գործակալութան միջև համագործակցության համաձայնագրի նպատակն է հիմնել տեխնիկական համագործակցություն՝ ինստիտուցիոնալ հզորացման, ջրօգտագործման տվյալների հավաքագրման գործընթացի բարելավման, ջրային ռեսուրսների համապարփակ կառավարման և տնտեսական մեխանիզմների կիրառումն ընդլայնելու համար:

ՀՀ բնապահպանության նախարար Էրիկ Գրիգորյանը գոհունակություն է հայտնել նաև ջրավազանային կառավարման պլանավորման լավագույն փորձով աշխարհում հայտնի Ֆրանսիայի հետ համագործակցությունը նոր հարթության վրա բարձրացնելու մեկնարկող գործընթացը։

ՀՀ–ում Ֆրանսիայի դեսպան Ժոնաթան Լաքոտը նկատել է, որ շրջակա միջավայրի պահպանությունը՝ մասնավորապես ջրային ռեսուրսների կառավարման հարցերը, երկու երկրների համագործակցության գերակայություններից են։