Մեծ Բրիտանիայում փոթորիկը դարձել է բազմաթիվ ավերածությունների և 3 մարդու մահվան պատճառ
«Քալում» փոթորիկը, որը հարվածել է Մեծ Բրիտանիային, խլել է 3 մարդու կյանք և բազմաթիվ ավերածություններ առաջացրել։ Այս մասին գրում է Mirror-ը։
Բրայթոնում տեղի բնակիչները նկատել են ծովում խեղդվող տղամարդու։ Դեպքի վայր ժամանած արտակարգ ծառայությունների աշխատակիցները չեն կարողացել փրկել նրա կյանքը։ Եվս մեկը զոհվել է Ուելսի Փենարթ քաղաքում ջրից դուրս բերելուց անմիջապես հետո։ Ավելի ուշ ոստիկանությունը հայտնել է 3-րդ զոհի մասին։ Տղամարդը մահացել է Կումդուադ բնակավայրում սողանքի հետևանքով։
Տարերային աղետից առավել տուժել է երկրի արևմուտքը։ Գետերը դուրս են եկել ափերից։ Բազմաթիվ տներ մնացել են առանց էլեկտրականության։ Երկաթուղային երթևեկությունը խաթարվել է։