2 անգամ դատապարտված և մի քանի գործով ամբաստանյալ՝ դպրոցի նախկին տնօրենին կրկին մեղադրանք է առաջադրվել
Համո Սահյանի անվան թիվ 70 դպրոցի արդեն նախկին տնօրեն Հերմինե Շափաղաթյանը երկու անգամ դատապարտվել է տուգանքի և երեք տարով զրկվել պաշտոն զբաղեցնելու իրավունքից, մեկ քրեական գործը կարճվել է, երկու գործով ամբաստանյալ է՝ երեք գործով նա մեղադրվում է խարդախության մեջ:
Խարդախության մեջ մեղադրվելու վերաբերյալ մեկ գործի նախաքննությունն էլ ավարտվել է, և գործը սեպտեմբերի 20-ին ուղարկվել է դատարան: Բացառությամբ մեկ դեպքի, նա մյուս բոլոր դեպքերում մեղադրվում կամ մեղադրվել է խարդախության մեջ՝ ՀՀ ՔՕ-ի 178-րդ հոդվածով:
Դատական տեղեկատվական համակարգից տեղեկանում ենք, որ Հերմինե Շափաղաթյանին մեղադրանք է առաջադրվել այն բանի համար, որ նա քաղաքացի Ա.Հ.-ի համար Գերմանիա մուտքի վիզա ձևակերպելու, քաղցկեղ հիվանդության դիմաց անհրաժեշտ բժշկական օգնություն ստանալու վերաբերյալ մտացածին, իր կողմից անիրագործելի խոստումներ տալով, վերջինից 2015թ. պահանջել, ստացել և խարդախությամբ հափշտակել է 3500 ԱՄՆ դոլար գումար։
Շափաղաթյանին մեղադրանք է առաջադրվել ՀՀ ՔՕ-ի 178-րդ հոդվածի 2-րդ մասի 2-րդ կետի հատկանիշներով:
Նախկինում երկու անգամ դատապարտված և այս պահի դրությամբ երեք գործով ամբաստանյալ Շափաղաթյանի նկատմամբ խափանման միջոց է ընտրվել ստորագրություն չհեռանալու մասին:
Բացի այդ, մեկ այլ գործով Շափաղաթայանը մեղավոր է ճանաչվել ՀՀ քրեական օրենսգրքի 178 հոդվածի 2-րդ մասի 2-րդ կետով` հինգ դրվագներով:
Դատարանը նրա նկատմամբ վերջնական պատիժ է սահմանել 800 000 ՀՀ դրամի չափով տուգանքը: Նա մարդկանցից գումար է վերցրել՝ խոստանալով նրանց տեղավորել աշխատանքի:
Մեկ այլ գործով Շափաղաթյանին մեղադրանք է առաջադրվել այն բանի համար, որ նա խարդախությամբ կատարել է ուրիշի գույքի զգալի և խոշոր չափերով հափշտակություններ: Նա մեղադրվում է կրկին ՀՀ ՔՕ-ի 178-րդ հոդվածով նախատեսված արարք կատարելու մեջ: Գործով հինգ տուժող կա:
Բացի այդ, Շափաղաթյանին մեկ այլ գործով՝ աշխատանքի տեղավորելու պատրվակով 2017 թվականի օգոստոսին Մարիամ Ռուստամյանին և հորը` Արթուր Ռուստամյանին 151.000 ՀՀ դրամ ամսական աշխատավարձով աշխատանքի տեղավորելու կեղծ խոստումներ տալով` Արթուր Ռուստամյանից ստացել և հափշտակել է 800 ԱՄՆ դոլար գումար: Նրան մեղադրանք է առաջադրվել ՀՀ ՔՕ-ի 178-րդ հոդվածով, սակայն քրեական հետապնդումը դադարեցվել է ապրիլի 18-ին:
Հերմինե Շափաղաթյանին մեղադրանք է առաջադրվել նաև այն բանի համար, որ նա Էմմա Քոչարյանին, Երևան քաղաքի թիվ 74 դպրոցում որպես կազմակերպիչ աշխատանքի ընդունելու վերաբերյալ մտացածին, իր կողմից անիրագործելի խոստումներ տալով, վերջինից 2017թ․հունիսին պահանջել, ստացել և խարդախությամբ հափշտակել է 500 ԱՄՆ դոլար գումար։ Նրան մեղադրանք է առաջադրվել ՀՀ ՔՕ-ի 178-րդ հոդվածի 1-ին մասի հատկանիշներով:
Հերմինե Շափաթաղյանը 2011թ., երբ եղել է Համո Սահյանի անվան դպրոցի տնօրեն, պաշտոնեական դիրքն օգտագործել է ծառայության շահերին հակառակ, որի հետևանքով դպրոցի աշխատակիցների աշխատավարձների ստացման համար բանկերում առկա հաշվեհամարների վրա ԴԱՀԿ ծառայության կողմից դրվել է արգելանք: Այդ ժամանակահատվածում մի շարք աշխատակիցներ աշխատավարձները ստացել են ուշացումներով:
Տնօրենին մեղադրանք էր առաջադրվել ՀՀ ՔՕ-ի 308-րդ հոդվածի 1-ին մասի հատկանիշներով, որում և ճանաչվել է մեղավոր: Հերմինե Նապոլեոնի Շափաղաթյանը մեղավոր է ճանաչվել ՀՀ քրեական օրենսգրքի 308-րդ հոդվածի 1-ին մասով նախատեսված արարքները կատարելու մեջ: Նշանակվող պատժին լրիվ գումարվել է նախորդ դատավճռով նշանակված 800.000 դրամ տուգանքը և վերջնական պատիժ է սահմանվել` տուգանք 1.000.000 ՀՀ դրամի չափով և կրթության ոլորտում գործունեությամբ զբաղվելու ու պաշտոններ զբաղեցնելու իրավունքից զրկելով 3 տարի ժամկետով: