Տավուշի 27 համայնքներ աշնանացանի համար աջակցություն կստանան. յուրաքանչյուր հա համար 60 հազար դրամ. Գյուղնախարար

Տավուշի մարզի 27 համայնքներ աշնանացանի համար աջակցություն կստանան: Այս մասին, սեպտեմբերի 17-ին, Տավուշի մարզ կատարած աշխատանքային այցի ժամանակ տեղի ունեցած խորհրդակցության ժամանակ նշել է ՀՀ գյուղատնտեսության նախարար Արթուր Խաչատրյանը:

Նրա խոսքով, այդ համայնքներում գյուղատնտեսությամբ զբաղվող ֆիզիկական եւ իրավաբանական անձանց սեփականության կամ համայնքային հողերի վարձակալության իրավունքը հաստատող փաստաթղթի հիման վրա յուրաքանչյուր հեկտարի հաշվով 60 000 ՀՀ դրամ կտրամադրվի մինչեւ 7 հեկտար աշնանացանի համար։

Նախարարը հատուկ շեշտել է բարձրակարգ խորհրդատվական ծառայությունների մատուցման անհրաժեշտությունը՝ հավելելով, որ Գյուղատնտեսության զարգացման հիմնադրամի մարզային կառույցներն այս առումով մեծ աշխատանք ունեն անելու։

«Խորհրդատուն այն մարդ պետք է լինի, որը միշտ կանգնած է գյուղացու կողքին, որպեսզի ցույց տա գյուղատնտեսության մեջ գիտական տեխնիկայի նվաճումները, օգնի, որպեսզի դրանք կիրառվեն տնտեսություններում, մյուս կողմից՝ «շտապ գյուղատնտեսական խորհրդատվություն» տրամադրի, երբ որեւէ խնդիր է տեսնում»,- մասնավորապես նշել է նախարարը։

Նշենք, որ Տավուշի մարզպետարանում աշխատանքային խորհրդակցությանը մասնակցել են մարզպետարանի, Գյուղատնտեսության զարգացման հիմնադրամի, Սննդամթերքի անվտանգության տեսչական մարմնի անասնաբուժական տեսչության մարզային պատասխանատուներ։