Եվգենի Պետրոսյանի կինը մտափոխվել է և չի ուզում ամուսնալուծվել. Պետրոսյանի փաստաբան

Ռուսաստանաբնակ հայտնի երգիծաբան Եվգենի Պետրոսյանի փաստաբան Սերգեյ Ժորինը մեկնաբանել է հումորիստի և նրա կնոջ՝ Ելենա Ստեպանենկոյի ամուսնալուծության ձգձգվելը, գրում է kp.ru-ն։

«Ստեպանենկոն հավանաբար հետաքրքրված չէ և չի ուզում ամուսնալուծվել Պետրոսյանի հետ: Մենք համոզված ենք, որ նա մտափոխվել է, այժմ նրա նպատակն այս դատավարությունը հնարավորինս երկար ձգձգելն է, այսինքն՝ հնարավորինս երկար Պետրոսյանի կինը մնալը, որպեսզի նա կա՛մ մտափոխվի ամուսնալուծվել, կա՛մ համաձայնի Ստեպանենկոյի՝ գույքի վերաբերյալ պահանջներին»,-ասել է Սերգեյ Ժորինը:

Փաստաբանը նաև նշել է, որ Պետրոսյանի և Ստեպանենկոյի գույքի բաժանումը կարող է տարիներ տևել, իսկ ամուսնալուծությունը՝ առնվազն 3-4 ամիս, գրում է ren.tv-ն։

Ավելի վաղ Պետրոսյանի փաստաբան Սերգեյ Ժորինը պատմել է, որ Ելենա Ստեպանենկոն նրան սկանդալով է սպառնացել, եթե հումորիստը չկատարի իր բոլոր պահանջները, և պահանջել է Պետրոսյանի հետ համատեղ ունեցվածքի 80%-ը։