Դատարանը պետք է այդ որոշումը կայացնի, Քոչարյանը պետք է լինի այնտեղ, որտեղ արժանի է. Րաֆֆի Հովհաննիսյան

«Ժառանգություն» կուսակցության հիմնադիր անդամ Րաֆֆի Հովհաննիսյանը ՀՀԿ-ին ընդդիմություն չի համարում: Նա այսօր լրագրողների հետ հանդիպմանն ասաց, թե ՀՀԿ-ն այսօր պարզապես իշխանությունից դե ֆակտո հեռացված ուժ է: Ինչ վերաբերում է ՀՀ վարչապետ Նիկոլ Փաշինյանի ղեկավարման 100 օրն ամփոփող ելույթին, Րաֆֆի Հովհաննիսյանը նշեց, թե ամբողջական ու զգացմունքային ելույթ էր, որը հիմնականում պատասխանում էր մինչ այս կառավարության հասցեին հնչած քննադատություններին:

«Չէր ներկայացվում վարչապետի հեռահար տեսլականը, այլ ավելի շատ պատասխանում էր այն քննադատություններին ու ռեպլիկներին, որոնք ստացել էր քաղաքական ու քաղաքացիական տարբեր հոսանքներից: Մենք զորակցում ենք ժամանակավոր այս կառավարությանը, հույս ունենք, որ արտահերթ խորհրդարանական ընտրությունները հնարավորինս շուտ կլինեն, ինչն էլ կարձանագրի հեղափոխության վերջնական հաղթանակը»,- ասաց նա:

Հովհանիսյանը համակարծիք չէ այն տեսակետի հետ, թե այսօր ՀՀ-ում խոսքի ազատության սահմանափակում կա: Նրա խոսքով՝ եղել են առաջարկներ, որոնք այսօր կառավարությունը շատ առողջ մթնոլորտում քննարկում է: Նա շեշտեց, որ, եթե իրենք նկատեն խոսքի ազատության սահմանափակման միտում, ապա առաջինը կքննադատեն:

«Եթե նման բան լինի, ապա մենք առաջինը կդատապարտենք ու կպաշտպանենք նրանց, ովքեր զրկվում են ազատ խոսքից: Ներկա պահին բոլորը ներկայացնում են իրենց տեսակետները: Ամեն դեպքում ուշագրավ է, որ նրանք, ովքեր երկար տարիներ սահամանափակել են խոսքի ազատությունը, գողացել են ընտրությունները, կատարել են այլ հանցագործություններ, սահմանափակել են լրագրողի՝ տեղեկացնելու իրավունքը, այսօր բողոքում են: Կարելի է քննադատել, կարելի է թույլ կետեր գտնել, սակայն առայժմ ազատ խոսքն առկա է, կա առողջ բանավեճ»,- նշեց Րաֆֆի Հովհաննիսյանը:

Վերջինը, անդրադառնալով վարչապետ Նիկոլ Փաշինյանի կողմից սահմանադրական փոփոխություններ անելու առաջարկին, հայտարարեց, թե ինքը կողմ է հանրաքվեի գաղափարին, կողմ է սահմանադրական փոփոխություններին՝ սահմանդիր նոր ժողովի միջոցով, սակայն կարծում է, որ փոփոխություններ կարելի է անել արտահերթ խորհրդարանական ընտրություններից հետո:

«Նման փոփոխությունների օպտիմալ ժամկետը կլինի արտահերթ խորհրդարանական ընտրություններից հետո: Մինչ այդ պետք է ճանապարհ գտնվի արտահերթ խորհրդարանական ընտրությունների համար, թեկուզ գործող Սահմանադրության համապատասխան: Եթե դրանք անհնար են գործող Սահմանադրությամբ, ապա թող հանրաքվե լինի: Սակայն ամբողջ գործընթացը բերել հրապարակ, սխալ է: Թեև կարևոր է պետություն-քաղաքացի հարաբերությունը, միևնույնն է, այն չի կարող փոխարինել իրավական մեխանիզմներին: Հրապարակը հրաշալի տեղ է, որտեղ փոխվում է երկիրը, այո, անհրաժեշտ է քաղաքացիական զարթոնքը պահպանել, սակայն հրապարակում բազմակարծություն ապահովելը դժվար է: Հրապարակում տարբեր տեսակետների արտահայտումը շատ դժվար է, գրեթե անհնար, քանի որ այնտեղ չի լինում բանավեճ, այլ հարթակից մեկն առաջարկ է անում, իսկ X քանակով մարդիկ դրան համաձայնություն են տալիս»:

Րաֆֆի Հովհաննիսյանը շեշտեց՝ իրենց նպատակն է, որ իրավական ու քաղաքացիական գործընթացները զուգահեռ զարգանան:

Ինչ վերաբերում է ՀՀ 2-րդ նախագահ Ռոբերտ Քոչարյանի՝ քաղաքականություն վերադառնալուն, Հովհաննիսյանն ասաց, թե նա իրավունք ունի գտնվել այնտեղ, որտեղ ցանկանում է՝ կլինի դա քաղաքականություն, թե բանտ: Միևնույն ժամանակ ընդգծեց, թե ինքը՝ որպես նախկին իրավաբան, կարող է ասել, որ Քոչարյանի խափանման միջոցը՝ կալանքը, փոխող դատավորը պարտավոր էր ինքնաբացարկ ներկայացնել, որովհետև շահերի բախում կար:

«Կարծում եմ՝ հեղափոխություն անկատար է, բայց դեռ չի ամբողջացել, մտահոգության տեղիք կա, սակայն չէի ցանկանա ֆետիշացնել 2-րդ նախագահի հանգամանքը՝ որպես նոր բևեռի ստեղծում: Կարծում եմ՝ բոլոր իշխանությունները՝ նախկին ու ներկա, պետք է պատասխան տան իրենց արած ու չարածի համար, հանցագործությունների համար»,- շարունակեց Րաֆֆի Հովհաննիսյանը:

Ըստ Հովհաննիսյանի՝ Ռոբերտ Քոչարյանի նկատմամբ մեղադրանք առաջադրելու հիմք կա, սակայն կարծում է, որ մնացած հարցերը, այդ թվում՝ մեղադրանքն ապացուցելը, արդեն դատական համակարգի խնդիրն է:

«Դատարանը պետք է այդ որոշումը կայացնի, Քոչարյանը պետք է լինի այնտեղ, որտեղ արժանի է: Սակայն չեմ կարծում, որ քաղաքական վտանգ կա իր «վերադարձի» մեջ, թեև ոմանց որոշ հույս է տվել ռևանշի: Այս պահին անհարկի խուճապի կարիք չկա»,-եզրափակեց Րաֆֆի Հովհաննիսյանը: