Նիկոլ Փաշինյանը չի մերժել Մադրիդյան սկզբունքները, գործընթացում փոփոխություններ չկան. Լարիսա Ալավերդյան

Մադրիդյան սկզբունքները շարունակում են բանակցությունների սեղանին մնալ , նոր իշխանությունների, վարչապետի կողմից չի մերժվել, կարգավորման գործընթացում փոփոխություններ չկան: Այս մասին լրագրողների հետ զրույցում ասաց «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը։ Նա ընդգծեց, որ Մադրիդյանը փաստաթուղթը հակաարցախյան է, հակատարածաշրջանային:

«Այլ բան չունենք սեղանի վրա, մենք ունենք միայն ու միայն Մադրիրդյան սկզբունքներ: Մադրիդյան սկզբունքների հիմքը դրվել է 1990-1991 թթ-ին, և 1992 թ-ին Հայաստանը համաձայնել է մի շատ տխուր կետի հետ, այն է, ինչը արտահայտել էր հարցազրույցի ընթացքում առաջին նախագահը, ըստ որի Հայաստանը համաձայն է, որ Արցախը մնա Ադրբեջանի կազմում՝ ավելի բարձր կարգավիճակով՝ ինքնավար հանրապետության: Դրանից այն կողմ հայկական կողմը որևէ ռեալ քայլ չի արել՝ փոխելու համար այդ մոտեցումը: 2-րդ և 3-րդ նախագահները խիստ կոշտ, բայց բանավոր ասել են, որ Արցախը չի կարող ենթարկվել Ադրբեջանին, քանի որ երբևէ չի եղել նրա կազմում, բայց փաստաթղթում ամրագրված չէ»-շեշտեց նա:

Լարիսա Ալավերդյանն ասաց, որ հիմա դիրքորոշման մեղմացնող արտահայտություններ են հնչում: Օրինակ՝ այն, որ նույն վարչապետ Նիկոլ Փաշինյանը, ով մայիսին հայտարարում էր, որ Արցախը պետք է բանակցային սեղանի կողմ լինի, հիմա հայտարարել է, որ բոլոր փաստաթղթերում նշված է, որ Արցախը պետք է մասնակցի բանակցություններին վերջին փուլում:

Լարիսա Ալավերդյանը զարմանալի է համարում այն, որ հայկական կողմից խոսվում է Նախիջևանի հարցով Կասպրշիկի գրասենյակ դիմելու մասին, սա այն դեպքում, որ ԵԱՀԿ Մինսկի խումբը նման մանդատ չունի: