Ոստիկանության պարզաբանումը՝ ճանապարհային նշանների տեղադրման համար կնքված պայմանագրերի մասին

Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը ֆեյսբուքյան իր էջում պարզաբանում է հրապարակել, որը ներկայացնում ենք ստորև:

««Հետք» կայքը «Ոստիկանությունը 1 մլրդ 590 մլն դրամի պայմանագիր է կնքել մեկ աշխատակից ունեցող ընկերության հետ» հրապարակման մեջ անդրադարձել է Երևան քաղաքում ճանապարհային նշանների տեղադրման, ճանապարհային գծանշումների իրականացման, լուսազդանշանների պահպանման ծառայությունների համար այս տարվա մայիս-հունիս ամիսներին ոստիկանության՝ ՙՈւկռինվեստ՚ ՍՊԸ հետ կնքված պայմանագրերին և որոշակի հարցեր բարձրացրել:

Բարձրացված խնդիրների առնչությամբ պարզաբանում ենք, որ ՀՀ ոստիկանության կողմից հայտարարված ճանապարհային նշանների տեղադրման, ճանապարհային գծանշումների, լուսազդանշանների պահպանման համար հայտարարված ընթացակարգերն իրականացվել են ՙԳնումների մասին՚ օրենքի 15-րդ հոդվածի 6-րդ մասի համաձայն:

Երեք մրցույթներն էլ հայտարարվել են էլեկտրոնային, ամենամրցութային բաց մրցույթ գնման ձևով, որը հրապարակվել է armeps.am և gnumner.am համակարգերում, տևողությունը՝ առնվազն քառասուն օր, և մասնակիցները հնարավորություն են ունեցել մասնակցելու և տեղադրելու իրենց հայտերը:

131 231 520 դրամ ընդհանուր ծավալով ճանապարհային նշանների տեղադրման համար մրցույթը հայտարարվել է 15.01.2018 թ., 14.02.2018 թ. հրավերում կատարվել է փոփոխություն՝ կապված տեխնիկական բնութագրի հետ, բացումը տեղի է ունեցել 27.03.2018 թ., արդյունքում՝ մասնակցել են ՙՈւկռինվեստ՚ ՍՊԸ-ն /ՙԷս Թի Սերվիս՚ ՍՊԸ-ի հետ համատեղ գործունեության կոնսորցիումի պայմանագրով/, որը առաջարկել է 99 874 000 դրամ, և ՙՌԱՕ Մարս՚ ՓԲԸ-ն, որն առաջարկել է113 288 448 դրամ:

Հաղթող է ճանաչվել ՙՈւկռինվեստ՚ ՍՊԸ-ն, որի հետ կնքվել է 99 874 000 դրամի պայմանագիր, իսկ 2018 թ. կարիքների համար նախատեսվել է 38 541 000 դրամ ֆինանսավորում և կնքվել է համապատասխան համաձայնագիր, որն ուժի մեջ է մտել լիազոր մարմնի /ֆինանսների նախարարության/ կողմից դրական եզրակացություն ստանալուց հետո՝ 14.06.2018 թ:

1 049 680 000 դրամ ընդհանուր ծավալով ճանապարհային գծանշումների համար մրցույթը հայտարարվել է 15.01.2018 թ, 14.02.2018 թ. հրավերում կատարվել է փոփոխություն՝ կապված տեխնիկական բնութագրի հետ, բացումը տեղի է ունեցել 27.03.2018 թ., մասնակցել է ՙՈւկռինվեստ՚ ՍՊԸ-ն /ՙԷս Թի Սերվիս՚ ՍՊԸ-ի հետ համատեղ գործունեության կոնսորցիումի պայմանագրով/, որը առաջարկել է 1 044 960 000 դրամ:

Հաղթող է ճանաչվել ՙՈւկռինվեստ՚ ՍՊԸ-ն, որի հետ կնքվել է 1 044 960 000 դրամի պայմանով պայմանագիր, իսկ 2018 թ կարիքների համար նախատեսվել է 429 644 000 դրամի ֆինանսավորում և կնքվել է համապատասխան համաձայնագիր, որը լիազոր մարմնի կողմից դրական եզրակացություն ստանալուց հետո ուժի մեջ է մտել 5.06.2018 թ:

645 608 000 դրամ ընդհանուր ծավալով լուսազդանշանների պահպանման համար մրցույթը հայտարարվել է 15.01.2018 թ., 14.02.2018 թ հրավերում կատարվել է փոփոխություն՝ կապված տեխնիկական բնութագրի հետ, բացումը տեղի է ունեցել 27.03.2018 թ., մասնակցել է ՙՈւկռինվեստ՚ ՍՊԸ-ն /ՙԷս Թի Սերվիս՚ ՍՊԸ-ի հետ համատեղ գործունեության կոնսորցիումի պայմանագրով/, որը առաջարկել է 445 030 000 դրամ և հաղթող է ճանաչվել:

ՙՈւկռինվեստ՚ ՍՊԸ-ի հետ կնքվել է 445 030 000 դրամի պայմանագիր, իսկ 2018 թ կարիքների համար նախատեսվել է 318 071 000 դրամի ֆինանսավորում և կնքվել է համապատասխան համաձայնագիր, որն ուժի մեջ է մտել միազոր մարմնի /ֆինանսների նախարարության/ կողմից դրական եզրակացություն ստանալուց հետո՝ 05.06.2018 թ»: