Կան անձինք, որ իրավունք չունեն դիտորդ լինել. Իոնիսյան
«Պետք է վերահսկել, թե ովքեր են դիտորդ դառնում, որովհետև, այնուամենայնիվ, կան անձինք, որ իրավունք չունեն դիտորդ լինել, օրինակ՝ թեկնածուն»,-այս մասին, այսօր՝ հուլիսի 16-ին, կառավարությունում Ընտրական օրենսգրքի փոփոխությունների շրջանակում քաղաքացիական հասարակության ներկայացուցիչների հետ տեղի ունեցած հանդիպման ժամանակ նշեց հանձնաժողովի քարտուղար Դանիել Իոաննիսյանը։
Նրա խոսքով, կարելի է գնալ միջանկյալ լուծման, որ կազմակերպությունը ԿԸՀ ներկայացնի դիտորդների ցուցակ, որը կարող է փոփոխել մինչև ընտրություններից առաջ 10-րդ օրը։
«Նախորդ ընտրություններում մենք ունեցել ենք 28 հազար հավատարմագրված դիտորդ, որոնցից հաստատ 5000-ից քիչն էր, որ իրապես դիտորդ էր և իրապես դիտորդություն էր իրականացնում, իսկ շուրջ 20 հազար մարդ, ես վստահ եմ, որ դիտորդի անվան տակ ուղղակի տեղամասում վստահված անձ էր, ինչը խնդրահարույց է, որովհետև ամեն դեպքում ԸՕ-ն ենթադրում է, որ կուսակցության ներկայացուցիչները մեկ ընտրատեղամասում պետք է սահմանափակված լինեն։ Այնինչ, դիտորդական առաքելության քողի տակ բազմաթիվ կուսակցություններ շրջանցում էին այդ արգելքը»,- նկատեց Իոաննիսյանը։
«Թրանսփարենսի ինթերնեշնլ» հակակոռուպցիոն կենտրոնի ղեկավար Սոնա Այվազյանն առաջարկեց դիտորդների վարքագծի ամբողջ պատասխանատվությունը ԿԸՀ-ից վերցնել և դնել հավատարմագրող կազմակերպությունների վրա, որոնք իրենք կհավատարմագրվեն և կստանան որոշակի քանակությամբ բեյջեր, և սահմանել որոշակի պատասխանատվություն։ Նրա խոսքով՝ նաև դիտորդների համար պետք է պարտավորություն սահմանել զեկույցներ ներկայացնելը։
Դ.Իոաննիսյանը նշեց, որ, եթե ամրագրում են հաշվետվություն ներկայացնելու պարտավորություն, ապա դրա չներկայացման դեպքում պատասխանատվություն պետք է լինի, նաև զեկույցի համար չափանիշեր պետք է սահմանվեն, որ 1-2 նախադասությամբ զեկույցներ չլինեն։
Դ.Իոաննիսյանը հայտնեց, որ ընտրություններում տեղամասային հանձնաժողովներում դիտորդների և լրագրողների թվի սահմանափակում չի լինելու: Նա տեղեկացրեց, որ դիտորդներին, լրագրողներին ընտրատեղամասից հեռացնելու ինստիտուտը դեռևս պահպանվում է, բայց փոփոխություններ կլինեն:
Հանձնաժողովի քարտուղարը տեղեկացրեց, որ նախատեսվում է նաև կրճատել հավատարմագրման ժամկետները՝ գործող 15 օրվա փոխարեն՝ մինչև 10-12 օր:
Հարցին, թե ո՞վ է որոշելու, թե որ միջազգային ՀԿ-ն է դիտորդական առաքելություն իրականացնելու, Իոաննիսյանը պատասխանեց, որ միջազգային դիտորդական առաքելության համար չափանիշներ պետք է դրվեն: