5000֊ից միայն 60֊ին բախտ վիճակվեց ճաշել Նիկոլ Փաշինյանի հետ (լուսանկարներ)

Մոսկվայի հայ համայնքի ոչ այնքան մեծ թվով ներկայացուցիչներ վարչապետ Նիկոլ Փաշինյանին սպասում էին Մոսկվայի հայկական եկեղեցու բակում։

Երբ ժամանեց վարչապետը, վանկարկումներ եղան, քոչարի բռնելու փորձ ևս, սակայն, ինչպես վկայում էին Սոչիի հանդիպման ականատեսները, Մոսկվայի հայերը ջերմ էին, բայց ավելի զուսպ էմոցիաների հարցում։

Ավելի մեծաթիվ ու հեղափոխական ոգով մոսկվայահայեր վարչպետին սպասում էին Մոսկվայի հաղթանակի թանգարանի մուտքի մոտ։ Նրանցից ոմանց
հաջողվեց ,նույնիսկ ,սելֆի անել վարչապետի հետ` հաղթահարելով վարչապետին պահպանող ռուսական անվտանգության կուռ պատնեշը։

Թանգարանում, որտեղ Հայաստանի Հանապետության կողմից որպես նվեր տեղադրվեց մարշալ Համազասպ Բաբաջանյանի կիսանդրին, ներկա էին համայնքային կառույցների ներկայացուցիչներ։ Նախնական ինֆորմացիայով վարչապետի անմիջական շփումը վերջիններիս հետ նախատեսված էր հենց թանգարանում, սակայն արարողությունը տևեց 15 րոպե, որից հետո վարչապետը պատվիրակության հետ ուղևորվեց դեպի ՀՀ դեսպանատուն։

Դեսպանությունում վարչապետի հանդիպումը համայնքային կառույցների ներկայացուցիչների հետ տեղի ունեցավ փակ ֆորմատով։ Պաշտոնական ճաշկերույթին հրավիրված էին սահմանափակ թվով հյուրեր և այն բաց չէր նաև մամուլի համար։

Մեր այն հարցին, թէ համայնքային մի շարք կառույցների ներկայացուցիչների կողմից կա տարակուսանք, թէ ինչ մոտեցմամբ են ընտրվել ու հրավիրվել ներկա գտնվող հյուրերը, ՀՀ դեսպան Վարդան Տողանյանը պատասխանեց, որ իրենք չէին կարող հրավիրել 5000 ցանկություն ունեցող մարդու, այդ իսկ պատճառով ներկա են լինելու միայն 60֊ը։

Նաիրա Բաղդասարյան