Կքննարկվի ոսկրածուծի փոխպատվաստման պետական պատվերի ներդրման հարցը. Նախարար
Առողջապահության նախարարությունում մտադիր են քննարկել ոսկրածուծի փոխպատվաստման պետական պատվերի ներդրման հարցը, քանի որ դա ուղղակիորեն կյանք փրկող միջամտություն է։ Այս մասին իր ֆեյսբուքյան էջում գրել է նախարար Արսեն Թորոսյանը, և տեղադրել է Արյունաբանական կենտրոնի հաղորդագրությունը.
«Այսօր Արյունաբանական կենտրոնը հյուրընկալել է մանկական փոխպատվաստաբաններ պրոֆ. Տոպոռսկիին Շվեդիայից, պրոֆ. Սեդլաչեկին Չեխիայից, աշխարհում հեմոգլոբինապաթիաներով զբաղվող առաջատար արյունաբան պրոֆ. Պոտենվիգելին ԱՄՆ-ից և ցողունային բջիջների կրիոկոնսերվացիայի մասնագետ պրոֆ. Բաբենկոյին Ռուսաստանից: Հյուրերը շրջել են մանկական բաժանմունքով, ծանոթացել են բաժնում գտնվող երեխաների բուժման ընթացքին, կենտրոնի մասնագետների հետ քննարկել են մանկական արյան հիվանդությունների բուժման, փոխպատվաստման հետ կապված հարցերը և իրենց խորհուրդներն են տվել ներկայացված արյան հիվանդություններով տառապող երեխաների բարդ դեպքերի վարման վերաբերյալ:
Հյուրերին և անձնակազմին հանդիպել է Առողջապահության նախարար Արսեն Թորոսյանը, ով Արյունաբանական կենտրոն կատարած իր առաջին այցի շրջանակներում ներկա է գտնվել կենտրոնի գործունեության ներկայացմանը, ծանոթացել է արտերկրում փոխպատվաստման կազմակերպման, ֆինանսավորման պրակտիկային և հյուրերի ու անձնակազմի հետ քննարկել է Հայաստանում ոսկրածուծի փոխպատվաստման ֆինանսավորման հնարավորություններն ու դրանց իրականացման նախադրյալները: Այցի ավարտին նախարարը խոստացել է առոջապահությանը հատկացվող բյուջեից միջոցներ տրամադրել տարվա ընթացքում 10 ոսկրածուծի փոխպատվաստումներ ֆինանսավորելու նպատակով»։