Եկամտահարկի իջեցման փոփոխությունը 20-22 մլրդ դրամի դիֆիցիտ է առաջացնելու, որի աղբյուրը չկա. «Ծառուկյան» դաշինքի առաջարկը հանձնաժողովը մերժեց
«Ծառուկյան» խմբակցության առաջարկը մինչև 150 հազար դրամ ստացողների համար եկամտահարկը իջեցնել՝ 23%-ից դարձնելով 21% ՀՀ ֆինանսների նախարարի տեղակալ Դավիթ Անանյանն անհիմն է համարում: ԱԺ Տնտեսական հարցերի մշտական հանձնաժողովում «Ծառուկյան» խմբակցության պատգամավորների առաջարկած «ՀՀ հարկային օրենսգրքում լրացում կատարելու մասին» օրենքի նախագծի քննարկմանը փոխնախարարը նշեց, թե այդ փոփոխությունը մոտավոր 20-ից 22 մլրդ դրամի դիֆիցիտ է առաջացնելու, որի աղբյուրը Կառավարությունը չունի, քանի որ պետբյուջով նախատեսված է 100 մլրդից ավելի պետական եկամուտների աճ:
Դավիթ Անանյանն անդրադաձավ Միքայել Մելքումյանի մատնանշած աղբյուրներին, որ դիզվառելիքի հաշվով ակցիզային հարկի բարձրացումով բյուջե ուղղված գումարները կարող են տեղաբաշխել: Նա նշեց, որ պետք է հիշել, որ երբ հայեցակարգը դրվեց հանրային քննարկման, առաջարկվեց ձեռնպահ մնալ այլ ոլորտները հարկելու մտադրությունից և առաջարկվեց եկամտահարկի այլ սանդղակ։
«Ձեր առաջարկած քայլը մեծ հարց չի լուծելու, 5-6 հազար աշխատակցի մասին է խոսքը, այսինքն՝ մեծ բեռ չի, բայց վարչարարությամբ մեծ ծախսեր է լինելու, հաշվարկի ծրագերը պետք է փոխվեն, անձնավորված համակարգերը փոխվի: Գնահատենք արժի՞ այդ ծախսերը»,-ասաց նա:
Մելքումյանը պնդեց, որ Կառավարությունը սխալ ճանապարհով է գնացել՝ մարդուն անտեսելով: «Որպեսզի բյուջեն փրկեք, բերել եք այնպիսի հարկային բեռի ավելացում, որ մարդու աղքատացման հաշվին բյուջեի ձեր ռեսուրսներն ուզում եք ապահովել»,-ասաց նա և որպես աղբյուր մատնանշեց նախատեսված առաջանցիկ տնտեսական աճը, որը լրացուցիչ եկամուտ պետք է բերի բյուջեին: Նա հարցեց, թե հաշվարկել են, ինչան գումար է կազմելու այն: Փոխնախարարը մոտավոր նշեց, թե հավանաբար 19-20 մլրդ:
«Բա ո՞ւր եք տանում, բերեք էստեղ` կոմպեսացրեք»,-ասաց նա:
Դավիթ Անանյանը նշեց, թե իրենք դրա տեղը գիտեին:
Օրենսդրական նախաձեռնությունը դրվեց քվեարկության և ստացավ հանձնաժողովի բացասական եզրակացությունը: