Որտե՞ղ են հանգստանում հայերը և որքա՞ն գումար է անհրաժեշտ մինիմալ հանգստի համար

Ամառը եկել է, և բնականաբար սկսվել է նաև հանգստանալու շրջանը:

Թե սովորաբար, որ երկրներ են մեկնում հայաստանցիները և ինչ գների սահմանում են կազմակերպում իրենց հանգիստը, այդ մասին Operativ.am-ի թղթակիցը զրուցեց տուրիստական ընկերությունների աշխատակիցների հետ:

«Թրեյզի տուր» ընկերության տուրմենեջեր Լիլիթ Ալեքսանյանի խոսքով՝ արդեն իսկ նկատելի է արտերկրում հանգստացողների թվի աճը.

«Աճը բավականին մեծացել է մայիս ամսվա նկատմամբ, ամենայն հավանականությամբ մինչև հուլիս, օգոստոս ամիսներն ավելի կմեծանա»,-ասաց Լիլիթը:

Այն հարցին, թե հատկապես ո՞ր երկրներն են մեկնում հայերը, տուրմենեջերը պատասխանեց, որ եվրոպական երկրներից Հունաստան, Բուլղարիա, Իսպանիա և Իտալիա են մեկնում, իսկ ոչ եվրոպական երկրների դեպքում՝ Դուբայ, Եգիպտոս, Թուրքիա:

Ինչ վերաբերում է գումարին, ապա տուրմենեջերի խոսքով՝ այն կախված է նրանից, թե մեկնողն ի՞նչ հյուրանոցում է հանգստանում, ի՞նչ սնունդն է ընտրում, նախընտրում է ինքնաթիռով, թե՞ ավտոբուսով մեկնել.

«Օրինակ Թուրքիայում հանգստանալիս մեկ անձի համար գները տատանվում են 500$-ից մինչև անսահմանափակ:

Իսկ եվրոպական որևէ երկրում տաս օր հանգստանալու համար միջինում 1100 եվրո անհրաժեշտ է հինգաստղանի հյուրանոցում մնալու համար»:

Ինչ վերաբերում է այն հարցին, թե գներն  անցած տարվա համեմատ թանկացե՞լ են, թե՞ ոչ, տուրմենեջերն ասաց, որ դեպի Եգիպտոս տուրի գումարն իջել է, Թուրքիան նույնն է, նույնն են նաև մնացած ուղղությունները:

«Դեպի Վրաստան տուր հատուկենտ դեպքերում է իրականացվում, քանի որ մարդիկ հիմնականում նախընտրում են իրենք միջոցներով գնալ հանգստանալու՝ առանց դիմելու տուրիստական ընկերությունների»:

Այն հարցին, թե տուրիստական ընկերությունների օգնությանն ավելի շատ ո՞ր խավն է դիմում, տուրմենեջերը նշեց.

«Բնականաբար ավելի շատ ունևոր մարդիկ են դիմում, քանի որ արտերիկիր մեկնելու համար անհրաժեշտ է մեծ գումար, Եվրոպա մեկնում են ավելի շատ ֆինանսական առումով կայացած ընտանիքները, իսկ մյուս երկրների դեպքում ֆինանսականն այնքան էլ կարևոր չէ, որովհետև կոնկրետ Եվրոպայի դեպքում դեսպանատանն իրենց ֆինանսական դիրքը պիտի ցույց տրվի. դեսպանատունը պետք է իմանա, թե ո՞ւմ է վստահում իր վիզան: Դուբայ կարող է մեկնել օրինակ ցածր խավի ներկայացուցիչ, ով մեկնում է ոչ միայն հանգստանալու, այլ նաև ապրանք բերելու»:

Մեկ այլ տուրընկերության՝ «Հեփի տուրի» տուրմենեջեր Անահիտ Սարգսյանի հաղորդմամբ՝ բավականին նկատելի է մարդկանց աճը, որոնք մեկնում են հանգստանալու: Տուրմենեջերի խոսքով՝ հայերն ավելի շատ մեկնում են Բուլղարիա, Եգիպտոս, Ռուսաստան, Ֆիլիպիններ, Շրի Լանկա:

«Թուրքիա այս տարի այնքան էլ չեն մեկնում, անկում է ապրել այնտեղ մեկնող մարդկանց թիվը, սակայն գնային որևէ փոփոխություն չի եղել»,- նշեց Անահիտը:

Այն հարցին, թե որքա՞ն գումարի շրջանակներում են հանգստի մեկնողները կազմակերպում իրենց հանգիստը, տուրմենեջերը պատասխանեց.

«Մեկ մարդու համար եվրոպական որևէ երկրում տաս օր հանգստանալու համար հարկավոր է միջինում 1500 եվրո»:

Զրուցեց Սեդա Ղուկասյանը