Հնարավոր է` աղջիկների համար ևս ռազմամարզական վարժարան ստեղծվի. Վիգեն Սարգսյան
Դիլիջանում այսօր` օգոստոսի 30-ին, տեղի ունեցավ «Մոնթե Մելքոնյանի անվան ռազմամարզական վարժարանի» հիմնադրամի հոգաբարձուների խորհրդի առաջին նիստը: Նիստի մեկնարկին ՀՀ պաշտպանության նախարար Վիգեն Սարգսյանն ընտրվեց հիմնադրամի հոգաբարձուների խորհրդի նախագահ, հիմնադրամի հոգաբարձուների խորհրդի քարտուղար` Օնիկ Մինասյանը:
Պաշտպանության նախարար Վիգեն Սարգսյանը ներկայացրեց հիմնադրամի հոգաբարձուների խորհրդի անդամներին` ՀՀ արդարադատության նախարար Դավիթ Հարությունյան, Սոնա Ղարիբյան, Տեր Մեսրոպ քահանա Արամյան, Սոնա Խուրշուդյան, Ավետիս Բերբերյան, Դավիթ Սահակյան, Շուշան Պետրոսյան, Բագրատ Արբազան:
Վիգեն Սարգսյանը հոգաբարձուների խորհրդի անդամներին ներկայացրեց վարժարանի կարգախոսը` «Ճանապարհ դեպի բարձունք»:
Լրագրողների հետ զրույցում ՀՀ պաշտպանության նախարար Վիգեն Սարգսյանը նշեց, որ սեպտեմբերի 1-ից «Մոնթե Մելքոնյանի անվան ռազմամարզական վարժարանը» կդառնա Հայաստանի ռազմամարզական կարեւորագույն հաստատություններից մեկը:
«Ավագ դպրոցն աշակերտների համար կդառնա տուն, որտեղ նրանք երեք տարիների ընթացքում` 10, 11, 12 դասարանների ընթացքում կպատրաստվեն ռազմական կրթության լավագույն ակադեմիական ծրագրերով: Հույս ունենք, որ նրանց մեծ մասը կընտրի սպայական մասնագիտությունը որպես հիմնական մասնագիտություն»,-ասաց նա:
Վիգեն Սարգսյանը նշեց, որ մանկավարժական թիմն ընտրվել է մրցութային կարգով` 3 դիմորդ 1 տեղի համար. «Արհեստավարժ մանկավարժական թիմ ունենք, բոլոր պայմանները ստեղծված են այստեղ եւ տղաները գալով այստեղ ավելի ոգևորված են ստանալու իրենց կրթությունը: Այս տարի ունենք 210 աշակերտ, վարժարանը նախատեսված է հենց 210 աշակերտի համար»:
Վիգեն Սարգսյանը նշեց, որ վարժարանը նախատեսված է տղաների համար, սակայն, նրա խոսքով, կանանց մեջ մեծ հետաքրքրություն կա դեպի զինվորական մասնագիտությունը. «Ժամանակի մեջ հնարավոր է նաև որ աղջիկների համար եւս ռազմամարզական վարժարան ստեղծվի»:
Հոգաբարձուների խորհրդի որոշմամբ, նոյեմբերի 20-ին` Մոնթե Մելքոնյանի ծննդյան օրը, ամեն տարի վարժարանի օր կնշվի: