ԱԺ հինգերորդ գումարման նստաշրջանի աշխատանքները՝ ըստ նախկին պատգամավորների

ԱԺ այս քառօրյայի ավարտվելու հետ մեկտեղ՝ ավարտվեց նաև ԱԺ հինգերորդ գումարման գարնանային նստաշրջանը:

Նստաշրջանի ընթացքում ընդունվեցին շատ նախագծեր, քննարկվեցին բազում հարցեր. պարզելու համար, թե ինչպիսին է ԱԺ հինգերորդ գումարման նստաշրջանի քննակումները՝ չորրորդ նստաշրջանի հետ համեմատած՝ Operativ.am-ի թղթակիցը զրուցեց ԱԺ չորրորդ գումարման տարբեր խմբակցությունների պատգամավորների հետ:

ԱԺ չորրորդ գումարման ՕԵԿ խմբակցության կազմում ընդգրկված  և այնուհետև նույն խմբակցությունից հրաժարված Գագիկ Բաղդասարյանը մեզ հետ զրույցում նշեց, որ նոր խորհրդարանում փոփոխություններ տեսնում է, մասնավորապես ՀԱԿ-ի գործունեությունն է աճել՝ ի զարմանս իրեն:

Խոսելով «Ժառանգություն» խմբակցության մասին՝ Բաղդասարյանը նշեց.

««Ժառանգությունը» ինչպես ակտիվ եղել է, այնպես էլ հիմա է ակտիվ՝ հաշվի առնելով այն հանգամանքը, որ նախկինում պատգամավորների թիվն ավելի էր, քան հիմա, բայց հիմա երեք պատգամավորով էլ իր ակտիվ գործելաոճը դրսևորում է»:

Նախկին ՕԵԿ-ական պատգամավորը դժվարացավ ինչ-որ բան ասել ՕԵԿ-ի գործունեության մասին.

«Իսկ եթե ավելի անկեղծ լինեմ՝ ասելու բան էլ չկա, չէի էլ ուզենա անդրադառնալ»:

«Իշխող կուսակցության աշխատանքը  չեմ տեսնում. նրա աշխատանքը երևում է այնքանով, որքանով աշխատում է նրանց կողմից ձևավորված Կառավարությունը: Նրանց աշխատանքի արդյունքը տեսնում եմ այսօր ՀՀ սահմանները հատող մարդկանց քանակով»,-ասաց  նախկին պատգամավորը:

Խոսելով ոչ իշխանական կուսակցության՝ ԲՀԿ-ի մասին՝ Բաղդասարյանը նշեց.

«Այլընտանք ասվածն ինձ համար անհասկանալի է, դա նույն պրոեկտն է, ինչ իմ նախկին խմբակցությունը՝ ՕԵԿ-ը. ես այդտեղ կուսակցություն ու գաղափար չեմ տեսնում: Մարդկանց համակիրների խումբ է, որը երեք տարի շարունակ ՀՀ քաղաքացուն թյուրիմացության մեջ գցեց. Երեք ընտրություն մենք անցանք և չենք հասկանում, թե ինչ տեղի ունեցավ. երևի մեզ մեկ տարի պետք է, որ կամաց-կամաց հասկանանք այդ պրոեկտների ու պրոցեսների իմաստը»:

Այն հարցին, թե որևէ ազդեցություն կունենա՞ն ընդունվող նախագծերը, Բաղդասարյանը պատասխանեց.

«Իհարկե փոխելու են, օր օրի ահագնացող արտագաղթը խոսում է հենց այդ մասին. երկրում հղիացել է հեղափոխական իրավիճակ, ժողովուրդը չի կարողանում ապրել այս պայմաններում, և իշխող կուսակցությունը չի կարողանում երկիրը կառավարել:

Քաոսային վիճակում ենք գտնվում, եթե վարչապետին այդպիսի սկանդալային մեղադրանք են ներկայացնում, էլ ինչի՞ մասին կարող ենք խոսել կամ ինչպես երեկ ԱԺ նախագահն ու փոխնախագահը հանկարծակիի են եկել Վերահսկիչ Պալատի զեկույցից, որ երկրում այսպիսի կոռուպցիոն զարգացում կա, առաջի՞ն անգամ լսեցիք, որ ՀՀ-ը խեղդվում է կոռուպցիայի մեջ»,- եզրափակեց իր խոսքը Բաղդասարյանը:

ԱԺ «Ժառանգություն» խմբակցության չորրորդ գումարման պատգամավոր Անահիտ Բախշյանը խոսելով դրական կամ բացասական առաջընթացի մասին նշեց, որ այն  դժվար է գնահատել, քանի որ կարևորն անդյունքն է:

«Ինձ համար շատ կարևոր է, թե ընդդիմությունը որքանով է կարողանում ազդել որոշումների քվեարկության վրա:

Ինչպես նախորդ նստաշրջանում, այնպես էլ հիմա ընդդիմադիր պատգամավորները չեն կարողանում ազդել որոշումների քվեարկության վրա, եթե մեծամասնությունը մի ուղղություն է վերցրել, որը ընդդիմությանը հակառակ է:

Այս գումարման ԱԺ-ում որպես կանոն ընդունվում են Կառավարության և մեծամասնական պատգամավորների ներկայացրած նախագծերը, բայց այն, որ ընդդիմությունը լուրջ առաջարկներ է անում, օրինակ պրն. Բագրատյանն է նման առաջարկներով հանդես գալիս, սակայն հաշվի չեն առնվում, չնայած վարչապետը հայտարարում է, թե մենք խորհրդակցելու ենք, լսելու ենք ընդդիմության ձայը, բայց լսում են ու իրենցը շարունակում»,- ասաց Բախշյանը:

ԲՀԿ-ական նախկին պատգամավոր Վարդան Բոստանջյանը գտնում է, որ ներկայիս ԱԺ-ում բազմակարծությունը շատ է.

«Այն ժամանակ ՀՀԿ-ն ու ԲՀԿ միասին էին, հիմա ՀՀԿ-ն էլ է առանձին, ԲՀԿ-ն էլ, ՀԱԿ-ն էլ, ՀՅԴ-ն էլ, այսինքն խմբակցությունները շատ են, ինչն էլ իր անդրադարձն է ունենում նաև նախագծերի քննարկման ժամանակ»:

Խոսելով ընդունված նախագծերի և վերջիններիս ազդեցության մասին Բոստանջյանը նշեց, որ կախված երկրի տնտեսության վիճակից իրենց անդրադարձն ունենում են, բայց քանի որ չի հետևել ԱԺ հինգերորդ գումարման նիստերին, ուստի խորությամբ չի կարող քննարկել:

ՀՀԿ-ական Ռաֆիկ Պետրոսյանը, ով ԱԺ չորրորդ գումարման նստաշրջանի մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալն է եղել, չցանկացավ որևէ կերպ մեկնաբանել ԱԺ հինգերորդ գումարման նստաշրջանի աշխատանքներն ու նախագծերը.

«Ես այդքան էլ հետաքրքրված չեմ այդ նախագծերով, որովհետև հասկացա, որ այնքան էլ էական չի, թե ինչ նախագծեր կընդունվեն մեր իրականությունում»,- ասաց Պետրոսյանը: