Առավել դժվար է հասնել «ես քեզ սիրում եմ» բառերն ասելու հոգեվիճակին. Արփինե Հովհաննիսյան

Operativ.am-ի բլից հարցերին պատասխանում է ԱԺ հինգերորդ գումարման ՀՀԿ խմբակցության պատգամավոր Արփինե Հովհաննիսյանը:

-Մանկության տարիների ամենանվիրական երազանքը:

-Երազանքներ շատ եմ ունեցել մանկության տարիներին. շատ էի ցանկանում շուրջերկրյա ճանապարհորդության մեկնել, երազում էի ուսուցչուհի դառնալ:

-Երազանք, որն արդեն իսկ իրականություն է դարձել:

-Երազանքներս, հաճախ, տարիների ընթացքում փոխակերպվելով դարձան նպատակներ, որոնք մինչ օրս էլ փորձում եմ իրականացնել: Ես դասավանդում եմ համալսարանում և ինձ շատ երջանիկ եմ համարում, որ այդ հնարավորությունն ունեմ: Իհարկե շուրջերկրյա ճանապարհորդության չեմ գնացել, բայց որոշ երկրներում եղել եմ: Հուսամ, երազանքներս և նպատակներս կշարունակեմ իրականացնել: Ինչպես ասում են երազանքները հիշողություններն են ապագայի մասին:

-Կցանկանայիք փոխել Ձեր բնավորության…

-Շուտ բռնկվելը, շուտ ոգևորվելը, շուտ հուզվելը և անգամ ոչ հարազատ մարդկանց կողմից երբեմն խոցվելու հատկությունը:

-Ունեցե՞լ եք հերոսի կերպար:

-Հերոսներ չեմ ունեցել. գրքեր շատ էի կարդում և ամեն գիրքը ընթերցելիս գտնում էի ինձ համար ամենահարազատ հերոսին, և այդ հերոսի որոշակի հատկանիշներն ինձ համար դառնում էին ընդունելի և ընդօրինակման արժանի:

Ժամանակին շատ էի սիրում կարդալ Հին Հունաստանի լեգենդներն ու առասպելները. շատ էի սիրում Այաքսի և Հեկտորի մենամարտի հատվածը, երբ իրենց բանակներն առաջնորդող երկու հերոսները բախվում են, սակայն հաշտությամբ հեռանում:

Կամ կարող եմ մտաբերել Սերո Խանզադյանի «Մխիթար Սպարապետ»-ը, այնտեղ ևս հիշարժան հատված կա, երբ Տեր Ավետիս հազարապետը իր բանակով օգնության է հասնում, երբ որևէ մեկը դրան չէր սպասում, այդ դրվագում նա հերոսական կերպարով է ներկայանում:

Շարքը կարող եմ շարունակել. Ռեմարկի, Բալզակի, Դոստոյեվսկու և այլ սիրելի հեղինակների ստեղծագործություններից յուրաքանչյուրը իր մեջ պարունակում է ինձ համար ընդունելի հերոսներ:

-Ինչպե՞ս կվարվեք, երբ Ձեր աչքերի մեջ նայելով փորձեն Ձեզ ստել:

-Ես քիչ առաջ նշեցի, որ կցանկանայի փոխել իմ բնավորության շուտ բռնկվելու հատկությունը: Ես ինձ համարում եմ հավասարակշված մարդ, սակայն խնդիրն այն է, որ արդարության նկատմամբ պահանջի զգացումը բարձր հիմքերի վրա է դրված և շատ անհանդուժող եմ անազնիվի, անարդարի, ստի նկատմամբ, ուստի այն պահին, երբ փորձում են աչքերիս մեջ նայելով սուտ խոսել, և առավելապես, երբ ես հստակ ու շատ պարզ գիտեմ ճշմարտությունը, գուցե այդ պահին չկարողանամ ինքս ինձ զսպել ու ասեմ դիմացինիս երեսին այն ամենը, ինչ մտածում եմ իր մասին, թեկուզ և մեկ պահ մտածելուց հետո այդպես չվարվեի և պարզապես արհամարհեի, սակայն միևնույն է հետագա արձագանքը ևս լինելու է արհամարհանքը:

-Ձեզ հնարավորություն է ընձեռվել որևէ անօրինական արարք անել, ի՞նչը կինի դա:

-Աշխատում եմ անօրինական արարքներ չանել, այս պահին չեմ կարող ասել, թե դա ինչ կլինի. կախված է կոնկրետ իրավիճակից, չեմ էլ բացառում, որ գուցե կանեմ, բայց ինձ համարում եմ գայթակղություններին չտրվող մարդ և հաստատապես չէի անի այնպիսի արարք, որի համար հասարակական պարսավանքի կենթարկվեի:

-Մարդն ունա՞կ է փոխվել:

-Շատ վաղ տարիքում գուցե, սակայն կարծում եմ, որ մարդիկ կամ նրանց բնավորության այն հատկանիշները, որոնք բնութագրում են նրանց էությունը, կազմում են իրենց էությունը և նկարագրում որպես մարդ՝ այդ հատկանիշներն ընդհանուր առմամբ չեն փոխվում:

Ես այն տեսակետի կողմնակիցն եմ, որ մարդը շատ ջանքեր պետք է գործադրի իր այս կամ այն անընդունելի հատկանիշները շտկելու համար, բայց փոխվել ամբողջապես կամ 90%-ով՝ կարծում եմ ոչ:

-Տղամարդկանց խառնվածքի այն գիծը, որը սկզբունքորեն տանել չեք կարողանում:

-Բամբասկոտություն, բամբասկոտությունն ինձ համար անընդունելի է. այդ պարագայում տղամարդը դադարում է տղամարդ լինելուց, կորցնում է կնոջ համար հենարան լինելու հատկանիշը, կարծես չգրված օրենքի պես կանանց տրված է այդ իրավունքը, որ նրանք կարող են նստել, խոսել, բամբասել, իսկ տղամարդը պետք է միշտ վեր կանգնի այդ ամենից, պետք է լինի առավել մեծահոգի, իսկ բամբասկոտ մարդիկ երբեք մեծահոգի չեն լինում, հատկապես՝ տղամարդիկ:

-Ի՞նչն է Ձեզ գրավում մարդկանց մեջ:

-Անկեղծությունը, ինձ հետ շատ հեշտ է ընկերանալ և գրավել, եթե մարդն ինձ հետ անկեղծ է, անկեղծությունն իրոք ինձ կաշառում է, երևի միակ մարդկային հատկանիշը, որի առաջ գլուխ եմ խոնարհում և, որը կարող է ինձ ստիպել և՛ տեսակետ փոխել, և՛միանգամից բացվել:

-Ձեր կյանքի ամենամեծ խենթությունը:

-Խենթություններ բառի դասական ձևակերպմամբ թերևս չեմ արել, համենայն դեպս այս պահին չեմ մտաբերում, բայց կյանքս ինքնին իր ամեն օրով մի նոր խնդիր կամ անակնկալ է ինձ բերում, որի լուծման կամ դիմանալու համար խենթություն է պետք. կյանքն ինքնին խենթություն է:

-Ի՞նչն է ավելի դժվար ասել. սիրում եմ, ներիր, թե հաջողություն:

-Երեքն էլ դժվար են. կախված է այն հանգամանքից, թե որ պահին ես ասում:

Հաջողությունը հատկապես դժվար է ասել այն մարդկանց, ում սիրում ես, ովքեր թանկ են բայց պետք է ասես հաջողություն:

Ներիր  համեմատաբար ավելի հեշտ է ասել, երբ դու գիտակցում ես, որ մեղավոր ես, բայց քանի որ, որպես կանոն, բացարձակ անմեղներ և մեղավորներ չեն լինում, այդ պարագայում ևս ներիր ասելը որոշակի դժվարություններ է ունենում:

Երեքից ամենահեշտը երևի սիրելն է, որ կարելի է ասել ավելի հեշտությամբ, առավել դժվար է հասնել «ես քեզ սիրում եմ» բառերն ասելու հոգեվիճակին, արտաբերելը շատ հեշտ է, իսկ այդ հոգեվիճակին հասնելը բավական դժվար:

-Անմարդաբնակ կզղում հայտնվելուց առաջ կարող եք երեք իր վերցնել Ձեզ հետ, որո՞նք կլինեն դրանք:

-Հեռախոս, հայելի, ատամի խոզանակ:

-Երջանիկ է այն մարդը, ով...

-Ով երբեք չի մտածում, թե ինքը ինչ կաներ երջանիկ լինելու համար, այլ պարզապես իրեն համարում է այդպիսին:

-Դուք կհամարեք, որ կյանքն անիմաստ չեք ապրել, եթե...

-Եթե գոնե մեկ մարդ լինի, ով կհամարի, որ ես այդ կյանքն անիմաստ չեմ ապրել.  իմ ընտանիքի անդամները, ընկերները, որովհետև կյանքը դու կարող ես համարել անիմաստ կամ ոչ անիմաստ, բայց գնահատականն ի վերջո դու չես տալիս:

Հեղինակ՝ Սեդա Ղուկասյան