Քաղաքագետ, որպես այդպիսին, Հայաստանում առանձնապես չեմ նկատում. լավ կլինի, որ քաղաքագետները գնան այբուբենը սկզբից սովորեն. Վահան Հովհաննիսյան

Operativ.am-ի թղթակիցն առաջիկա ավագանու ընտրությունների, ներքաղաքական վերջին դեպքերի, քաղաքականության մեջ երիտասարդների դերի և  Պռոշյան գյուղի գյուղապետ Հրաչ Մուրադյանի սպանության մասին զրուցեց ՀՅԴ Բյուրոյի անդամ, ԱԺ ՀՅԴ խմբակցության պատգամավոր Վահան Հովհաննիսյանի հետ.

-Պրն. Հովհաննիսյան, ինչպե՞ս կգնահատեք ՀՅԴ-ի շանսերն ավագանու ընտրություններին, հատկապես այն հանգամանքից հետո, որ ՀՅԴ-ն չմասնակցեց նախագահական ընտրություններին.

-ՀՅԴ-ի կառույցն ամեն ինչ կանի հաղթելու համար, բայց կանխատեսումներ անել չեմ կարող:

-Ի՞նչ կասեք ՀՅԴ-ի ցուցակի մասին, ըստ Ձեզ՝ այն հաջողվա՞ծ է:

-Իմ խորին համոզմամբ՝ այն բոլոր ներկայացված ցուցակներից ամենալավն է:

-Պրն. Հովհաննիսյան, որոշ քաղաքագետներ այն տեսակետն են հայտնում, թե ՀՅԴ-ի ավելի տարեց պատգամավորները կառչած եմ իրենց աթոռներից և չեն պատրաստվում իրենց տեղը զիջել երիտասարդներին, ի՞նչ կասեք այս մասին:

-Ես չգիտեմ` որ քաղաքագետների մասին է խոսքը, բայց քաղաքագետ, որպես այդպիսին, Հայաստանում առանձնապես չեմ նկատում: ՀՅԴ-ի մեջ ոչ ոք իր աթոռին կառչած չէ. կարող եք վստահ լինել: Հասարակ մի օրինակ քաղաքագետ կոչվածների՝ ՀՅԴ-ն, երբ կոալիցիայից դուրս եկավ, ՀՅԴ-ական բոլոր նախարարները, ԱԺ փոխնախագահը, շատ հանգիստ ստորագրեցին իրենց հրաժարականները և դուրս եկան իրենց պաշտոններից, Հայաստանում ոչ մի ուրիշ կուսակցության  նման բան անել չի հաջողվել, ուստի լավ կլինի, որ քաղաքագետները գնան այբուբենը սկզբից սովորեն:

-Ո՞րն է պատճառը, որ ՀՅԴ-ի շարքերում այնքան էլ երիտասարդ պատգամավորներ չկան:

-Եթե Դուք համարում եք, որ օրինակ Արմեն Ռուստամյանը կամ Արծվիկ Մինասյանը տարեց մարդիկ են, ապա չգիտեմ` ինչ ասել:

-Խոսքը բացառապես շատ երիտասարդ պատգամավորների մասին է, ինչպիսին կան ՀՀԿ-ում և ԲՀԿ-ում:

-Հատկապես ՀՀԿ-ում մի շարք երիտասարդ պատգամավորներ կան, որոնք  ափեղ-ցփեղ բաներ են խոսում իրենց ելույթի ժամանակ,  խայտառակում են և՛ իրենց կուսակցությունը, և՛ երկրի նախագահին. կարծում եմ, որ երիտասարդությունը միշտ չէ, որ դրական ազդեցություն է թողնում:

-Պրն. Հովհաննիսյան, երբ ՀՅԴ-ն սատարեց «Ժառանգության» առաջնորդին, այն տեսակետը հայտնեց, թե ՀՅԴ-ն երբևէ չի մտնում այն գործընթացների մեջ, որի վերջը չի տեսնում, արդյոք վերջը չտեսնելն էր պատճառը, որ այլևս ՀՅԴ-ական պատգամավորներ չկան Րաֆֆի Հովհաննիսյանի կողքին:

-Մենք համակերպված, պլանավորված աշխատանքի կողմնակիցներ ենք, այն, ինչը մենք ցանկանում էինք տեսնել որպես շարժում, պետք է լիներ իշխանությունը փոխելու ուղղությամբ, սակայն այն  շատ էմոցիոնալ և զգացմունքային մակարդակով է կառավարվում, եթե ընդհանրապես կառավարվում է: Ուստի շատ դժվար է նման պրոցեսին համագործակցելը:

-Պռոշյանի գյուղապետ ՀՅԴ-ական Հրաչ Մուրադյանի սպանության գործը պե՞տք է քաղաքականացնել:

-Ոչ մի դեպքում չի կարելի քաղաքական շահարկումների տեղ տալ, այդ ողբերգությունը քաղաքական շահարկումների առարկա չէ, իսկ թե քաղաքական դրդապատճառներ եղել են, թե ոչ, դա պետք է պարզի քննությունը, իսկ շահարկումներն անթույլատրելի են:

Հրաչ Մուրադյանն իսկական հերոս է, ազգային հերոս կարելի է ասել իր մասին և իր անվան մասին շահարկումներ անել կամ անհարգի հայտարարություններ, ինչպես արեց Կոտայքի մարզպետը և որոշ ՀՀԿ-ական պատգամավորներ, այդ հենց  իրենք են քաղաքական շահարկումներ անում:

-Իսկ այդ սպանությունը կդառնա հերթական սպանություններից մեկը, որն այդպես էլ չի բացահայտվի:

-Դա արդեն ոստիկանության աշխատանքն է` բացահայտել սպանությունը:

-Հավատու՞մ եք նրան, որ Ձեր կուսակից ընկերոջը սպանողը  կստանա իր պատիժը:

-Ցանկանում եմ հավատալ, որ այդպես կլինի և եթե անհրաժեշտ է ինչ-որ բան անել, պատրաստ եմ անել:

Զրուցեց Սեդա Ղուկասյանը