Թաղման արարողությունը հետաձգվել է

Ադրբեջանի Գեյչայի շրջանի Քյուրդամիշ գյուղում, որտեղ շաբաթ օրը պիտի կայանար առեղծվածային պայմաններում փետրվարի 28-ին զոհված զինվոր Սեյմուր Ալլահվերդիևի թաղումը, փաստորեն հայտարարվել էր արտակարգ դրություն:

Այսօր ոստիկանությունը հսկողություն է սահմանել գյուղ տանող բոլոր ճանապարհների վրա և ներս չի թողել Բաքվից ժամանած լրագրողներին և իրավապաշտպաններին:

Ոստիկանությունը ձեռնարկված միջոցառումները հիմնավորել է այն պատճառաբանությամբ, որ զոհվածի հարազատները չեն ցանկանում շփվել լրագրողների և իրավապաշտպանների հետ:

Սակայն մահացած զինվորի հարազատները և ծնողներն իրենք են մոտեցել և պահանջել, որպեսզի նրանց թույլ տան մտնել գյուղ: Ոստիկանությունը փորձել է անտեսել նաև այդ պահանջը, բայց, ի վերջո, լրագրողների և իրավապաշտպանների անցումը դեպի գյուղ թաղման  արարողության մասնակիցները ապահովել են ուժի կիրառմամբ:

Իրավապաշտպանները կարծում են, որ իրենց մուտքը գյուղ արգելելու հրահանգը տվել է Գեյչայի շրջանի գործադիր մարմինը:

Թաղումը պետք է կայանար կեսօրին, սակայն արարողությունը հետաձգվել է:

Հանգուցյալի հայրը պահանջում է կատարել ևս մեկ փորձաքննություն և քանի դեռ դա չի իրականացվել, նա թույլ չի տալիս թաղել իր որդուն:

Զոհվածի հարազատները չեն հավատում նրա ինքնասպանության մասին մինչ այժմ տարածված վարկածին և գտնում են, որ զինվորին սպանել են:

Լրատվամիջոցները հաղորդում են, որ շուտով գյուղ կժամանեն Ադրբեջանի ՊՆ-ի փորձագետներ: