100 տարի առաջ ծնվել է Լուի դը Ֆյունեսը
«Ես գիտեմ, թե որն է լինելու իմ ամենահաջող կատակը. դա կլինի իմ հուղարկավորությունը: ես պետք է դա այնպես խաղամ, որ բոլորը քրքջան անդադար»:
Ֆրանսիացի դերասան Լուի դը Ֆյունես դը Գալարսան ծնվել է Կուրբեվուայում (Ֆրանսիա) 1914թ. հուլիսի 31-ին: Նրա ծնողներն արմատներով Սևիլիայից էին: Նրա հայրը' Կարլոս Լուի դը Ֆյունես դը Գալարսան, Իսպանիայում փաստաբան էր աշխատում, իսկ Ֆրանսիա տեղափոխվելուց հետո դառնում է ալմաստ մշակող: Նրա մայրն ուներ իսպանական և պորտուգալական ծագում:
Մանուկ հասակում Լուի դը Ֆյունեսն իր ընկերներին հայտնի էր որպես «Ֆյուֆյու»: Նա խոսում էր ֆրանսերեն, իսպաներեն և անգլերեն: Երիտասարդ ժամանակ զբաղվում էր նկարչությամբ և դաշնամուր էր նվագում:
Հիմնականում քիչ վարձատրվող աշխատանքներ էր կատարում, որոնցից նրան հաճախ ազատում էին: Աշխատել է նաև որպես դաշնակահար' հիմանականում ջազ ոճի երգեր նվագելով Պիգալում:
1936թ. Լուի դը Ֆյունեսն ամուսնանում է Ժերմեն Լուիզ Էլոդի Քարոյերի հետ: Ամուսնությունից ծնվում է մի որդի' Դանիելը: 1942թ.-ի վերջում նրանք ամուսնալուծվում են:
Պատերազմի ավարտից հետո դը Ֆյունեսն իրեն փորձում է կինոյի ոլորտում: Մինչ այդ Լուի դը Ֆյունեսը սովորում էր Ռենե Սիմոնի դրամատիկական կուրսերում: 1945թ.-ին նա նկարահանվում է «Բարբիզոնյան գայթակղություն» ֆիլմում, որի ռեժիսորը Պան Ստելին էր: Բայց փառքի հասնելու համար նա դեռ շատ երկար ճանապարհ պետք է անցներ:
1958թ. Լուի դը Ֆյունեսը ռեժիսոր Իվ Ռոբերի «Բռնված չէ, գող չէ» ֆիլմում մարմնավորում է գլխավոր հերոսին' որսագող Բոլերոյին: Այս ֆիլմը նրան մեծ ճանաչում է բերում: Ֆիլմի լույս տեսնելուց հետո արտասահմանում նրան անվանում էին «Դոնալդ Դաք»:
1960-ական թվականներին Լուի դը Ֆյունեսը մեծ ժողովրդականություն էր վայելում: Նա տարեկան նկարահանվում էր երեք-չորս ֆիլմում: Այդ տարիներին նա նկարահանվում է Անդրե Յունեբելի «Ֆանտոմաս» եռագրությունում: Ռեժիսորը հենց սկզբից ծրագրել էր նկարահանել Ֆանտոմասի մասին պատմող տասը ֆիլմ, բայց քանի որ ֆիլմն այնքան էլ ընդունված չէր, նա սահմանափակվում է ընդամենը երեք ֆիլմով: Ֆիլմերից վերջինը «Ֆանտոմասն ընդդեմ Սքոտլանդ Յարդի»-ն էր:
1970թթ. Լուի դը Ֆյունեսը շարունակում էր համարվել Ֆրանսիայի ամենասիրելի ու ամենահայտնի դերասաններից մեկը: Նա ակտիվորեն նկարահանվում էր տարբեր ֆիլմերում: 1973թ.-ի մարտի 15-ին պարգևատրվում է Ֆրանասիայի ամենաբարձր պարգևով' Պատվո լեգիոնի շքանշանով:
1975թ. Լուի դը Ֆյունեսը միանգամից երկու ինֆարկտ է տանում: Բժիշկների պնդմամբ դերասանը հեռանում է կինոյից և տեղափոխվում Նանտից ոչ հեռու գտնվող 17-րդ դարի իր առանձնատունը: Այնտեղ էլ դերասանը տարվում է վարդեր աճեցնելով: Ըստ որում' «Մեյան» ֆիրմայի աճեցրած վարդի տեսակներից մեկը կոչվել է Լուի դը Ֆյունես' ի պատիվ մեծ դերասանի:
Դերասանն ունի երեք որդի' Օլիվյե դը Ֆյունես, ով «Էյր Ֆրանս» ընկերության օդաչու է (հայրն ուզում էր, որ իր որդին դառնար դերասան, բայց տղան դեմ էր այդ որոշմանը և մի քանի ֆիլմերում նկարահանվելուց հետո թողնում է դերասանական կարերիան), Դանիել դը Ֆյունես և Փաթրիմ դը Ֆյունես' մասնագիտությամբ բժիշկ: