Կարեն Օհանյանն այս անգամ հաղորդավար Միկայի հետ հանդես կգա «Մանկական եվրատեսիլ 2014»-ի հայաստանյան փուլում. (լուսանկարներ)

Մանկական երգարվեստի ակտիվ ներկայացուցիչ Կարեն Օհանյանն օրեր առաջ վերջացրել է իր նոր` «Shine out» երգի տեսահոլովակի նկարահանումները: Operativ.am-ի թղթակիցն այդ մասին զրուցեց Կարեն Օհանյանի հետ: Վերջինս պատմեց իր տեսահոլովակի և հետագա անելիքների մասին:

Երգի հեղինակն ինքը` Կարենն է, իսկ գործիքավորողը` երգիչ, կոմպոզիտոր Գուժը: Փոքրիկ ստեղծագործողը երգը գրել է «Եվրատեսիլի 2014»-ի հայաստանյան փուլին մասնակցելու համար: «Մանկական Եվրատեսիլ 2014»-ին մասնակցելը Կարենի համար նորություն չէ: Նա արդեն երրորդ անգամն է մասնակցում՝ ամեն անգամ էլ ավելի կատարելագործելով իրեն:

«Ինձ համար կարևորը լավ ներկայանալն է, որ ելույթիցս հետո մարդիկ հիշեն ինձ իմ երգով»,-ասաց Կարեն Օհանյանը:

Կարենի խոսքով` երգը բարության մասին է, ինչը արտացոլվել է նաև տեսահոլովակում: Տեսահոլովակի ռեժիսորը Արմեն Փիրիմասիհին է:

«Անցած տարվա նման, երգի մեջ ռեփի հատված կա, որն այս տարի որոշեցի, որ ուրիշը կարդա և հանդես գանք դուետով: Մտքովս անցավ, որ դա կարող է անել Միկան: Առաջարկեցի նրան ու էդպես որոշեցինք երկուսով ներկայանալ Եվրատեսիլի հայաստանյան փուլին»,-ասաց Կարենը

Այն հարցին, թե արդյոք հեշտ ստացվեց Միկայի հետ համագործակցելը, Կարենը պատասխանեց. «Այո, չնայած ավելի հեշտ է, երբ ինքդ ես կառավարում քո երգը, բայց քանի որ ես արդեն փորձ ունեմ դուետով հանդես գալու, ինձ համար դժվարություն չառաջացավ»:

«Ուզում եմ շնորհակալություն հայտնել իմ գեղարվեստական ղեկավարին՝ Նադեժդա Սարգսյանին, քանի որ երգի ու նաև տեսահոլովակի ստեղծման գաղափարը հենց նա է տվել: Շնորհակալ եմ բոլոր նրանց, ովքեր մասնակցել են այս երգի ստեղծման աշխատանքներն.Գուժին, Ջուսին և մյուսներին»,-ավելացրեց փոքրիկ երգիչը:

Operativ.am-ի թղթակիցը զրուցեց նաև Միկայի հետ: Ինչպես բոլորիս հայտնի է՝ Միկան երգարվեստում հայտնի չէ: Նա հաղորդավար է, սակայն երգելու առաջարկը կարծես թե նրան շատ է դուր եկել այն աստիճան, որ մեզ հետ զրույցի ժամանակ նույնիսկ կարծիք հայտնեց, որ կշարունակի երգարվեստում դրսևորել իրեն: Միկայի խոսքով` սկզբում դժվարացել է դուետով հանդես գալ, սակայն ամեն ինչ արագ կարգավորվել է և հիմա նրանք լիարժեք պատրաստ են ներկայանալ հանդիսատեսին: Միկայի հետ ռեփի հատվածի հետ կապված Ջուսն է աշխատել:

Տեսահոլովակի նկարահանման ժամանակ, որպես կանոն, բազմաթիվ զվարճալի դեպքեր են պատահում, որոնցից մեկը առանձնացրեց Միկան: Նա պատմեց, որ օպերատորը ողջ նկարահանմանը ստիպված էր տեսախցիկն այնպես պահել, որ հետևում պառկած սիրահար զույգը չերևար:

Տղաներին մաղթենք հաջողություն առաջիկա մրցույթում և սպասենք տեսահոլովակի պրեմիերային:

Կարինե Գևորգյան