4 ժամ ավելացված քվեարկությունը չխանգարեց Հայաստանին. «Հանդիսատեսի համակրանք» անվանակարգում հաղթանակ տարավ Սոնա Ռուբենյանը
Ինչպես հայտնի է օրեր շարունակ ընթանում էր «Նոր ալիք» երգի մրցույթը: Հայաստանը մրցույթում ներկայացրեց Սոնա Ռուբենյանը: Մրցույթի 3 օրվա արդյունքներով մեր մասնակիցը զբաղեցրեց 6-րդ հորիզոնականը: Սակայն Հայաստանն ունեցավ 2 մրցանակ. այն է` Woman.ru կայքի անցկացրած քվեարկության արդյունքում՝ «Նոր ալիք 2014» երգի մրցույթի լավագույն արտիստ ճանաչվեց Սոնա Ռուբենյանը:
Երկրորդ կարևոր հաղթանակը` «Հանդիսատեսի համակրանք» անվանակարգն էր, որն անցավ լարված հատկապես այն բանից հետո, երբ քվերակության ավարտից հետո հայտարարվեց, որ քվեարկությունը երկարացվել է ևս 4 ժամով: Սա հարուցեց հայ հասարակության դժգոհությունն ու բնականաբար հարց ծագեց, թե ինչու նման որոշում կայացվեց: Իսկ նման որոշման պատճառը պարզ դարձավ 4 ժամվա ընթացքում: Սկզբում պայքարն ընթանում էր Հայաստանի և Ղազախստանի միջև, սակայն մրցանակի գլխավոր հավակնորդներին միացավ նաև Լիտվան: Վերջինս ակտիվ սկսեց քվերակել և 4 ժամվա ընթացքում հավաքեց այնքան ձայն, որքան կարելի էր հավաքել մի քանի օրվա ընթացքում: Սակայն քվեարկության արդյունքներն ամփոփելուց հետո պարզ դարձավ, որ «Հանդիսատեսի համակրանք» անվանակարգում հաղթանակ է տարել Հայաստանի ներկայացուցիչը` Սոնա Ռուբենյանը: Վերջինս հավաքեց 19370 ձայն: Երկրորդ տեղում Ղազախստանի ներկայացուցիչն է 18158 ձայնով, իսկ 3-րդ տեղում` 16324 ձայնով Լիտվայի ներկայացուցիչը:
Այս ամենից կարելի է ենթադրել, որ մրցույթի կազմակերպման մեջ կան թերացումներ, որոնք նման իրավիճակ են ստեղծում:4 ժամով ավելացված քվեարկությունը չխանգարեց Հայաստանին: Հարցեր, որոնց պատասխանները հանրությունը լավ գիտի: Դժվար չէր հասկանալ քվերակության 4 ժամով ավելացման իմաստն ու նպատակը: Սակայն մեկ բան պարզ է. տաղանդը կոտրել կամ գնել հնարավոր չէ:
Գայանե Մելիքյան