Ես սիրում եմ իմ անձը, երբեք չեմ ցանկացել ուրիշ մեկին նմանվել. Ալբերտ Բոյադջիան (լուսանկարներ)

Ազգությամբ հայ տաղանդավոր Ալբերտ Բոյադջիանը բնակվում է Լիբանանում, սակայն ծնվել է այստեղ: Լիբանանում նրան շատերն են ճանաչում: Նա հայտնի երաժիշտ է, պարող, նաև պարուսույց: Ծնվել է արվեստագետների ընտանիքում: Հինգ տարեկանից սկսել է զբաղվել պարով: Այժմ Ալբերտը նաև նվագում է և ունի սեփական ձայնագրման ստուդիան:

2000 թվականին նա «Արեգ» մանկապատանեկան թատերախմբի հետ ելույթ է ունեցել Հայաստանում: Մոտ ապագայում Ալբերտը կրկին պատրաստվում է այցելել Հայաստան:

Ինչու՞ ի սկզբանե որոշեցիք զբաղվել պարով:

-Երբ փոքր էի, հյուրախաղերի էի գնում ընտանիքիս հետ, պարում էի: Պարել շատ էի սիրում: Մի օր ծնողներս համազգային մրցույթի էին մասնակցում: Ես տեսա հորս մեծ բեմի վրա պարելուց և ագահությամբ վազեցի դեպի բեմը: Ուզում էի պարել բեմի վրա նրանց փոխարեն: Մայրս նկատեց բեմ դուրս գալու ձգտումս և ինձ պարի դպրոց տարավ: Այսպես ես սկսեցի պարել «Գայանե» համազգային պարախմբում:

Ինչպե՞ս եք գնահատում ընտանիքի դերը ձեր մասնագիտական նվաճումների հարցում:

-Անչափ շնորհակալ եմ մորս, որ կարողացավ ինձ փոքրհասակից դեպի ներկայիս մասնագիտությունը մղել: Մայրս ինձ տարավ պարի, թատրոնի, նվագի: Կցանկանայի նշել, որ առհասարակ ընտանիքի դերը շատ մեծ է արվեստագետի ձեռքբերումների հարցում:

Ձեր գնահատմամբ, ո՞րն է ձեր կյանքի ամենամեծ ձեռքբերումը:

-Կյանքիս ամենամեծ ձեռքբերումն այն էր, որ կարողացա հեղինակավոր խմբերի հետ պարել, ապա հեռանալ և, միայնակ բարձրանալով բեմ, թե´ նվագել, թե´ ելույթ ունենալ:

Որո՞նք են արվեստագետի բնավորության կարևոր գծերն ըստ ձեզ:

-Համեստությունը, ազնվությունը, մարդամոտությունը, ուրիշ արվեստագետի և սեփական ընտանիքի հանդեպ ունեցած հարգանքը:

Ի՞նչն է ձեզ օգնում և ներշնչում աշխատանքում:

-Մեծ բեմերի վրա ելույթ ունենալուց առաջ հայրենիքիս անունն եմ արտասանում:

Ո՞վ է ձեր կուռքը, ո՞ւմ կուզեիք նմանվել:

-Ես սիրում եմ իմ անձը: Երբեք չեմ ցանկացել ուրիշ մեկին նմանվել:

Երբեևէ մտածե՞լ եք այստեղ՝ Հայաստանում, սեփական նախագիծ ունենալու մասին:

-Անշուշտ: Երազանքս հենց դա է՝ ելույթ ունենալ հայաստանցիների առջև: Սկզբում Ֆելիքս Հարությունյանի հետ Լիբանանում սկսեցի դասական բալետով զբաղվել, իսկ հիմա, քանի որ զբաղվում եմ պարային տարբեր ոճերով, նաև կուզեի այս նոր ոճերը զարգացնել Հայաստանում:

Ինչո՞վ եք զբաղվում ներկայում:

-Ներկայում աշխատում եմ միջոցառումների ժամանակ: Մասնակցում եմ հարսանեկան արարողությունների, տարբեր միջոցառումների բացումների, ցուցադրական շոուների, նաև մասնակցում եմ միջազգային միջոցառումների հայտնի «Rahban group»-ի հետ: Բացի այդ, ես ունեմ իմ սեփական երաժշտական խումբը և սեփական ձայնագրման ստուդիան:

Ի՞նչ նոր մտահաղացումներ ունեք ապագայի համար:

-Ես մեծ ցանկություն ունեմ համաշխարհային ճանաչում ձեռք բերելու: Առհասարակ, շատ կուզեի, որ հայ երաժիշտներով հասնեինք այդ կետին: Դա ինձ համար մեծ հպարտություն կլինի:

Վարդուհի Ստեփանյան