Հանդիպման ժամանակ ի՞նչ են քննարկել Սերժ Սարգսյանն ու Րաֆֆի Հովհաննիսյանը. փորձագետ

Operativ.am-ի թղթակիցը «Սերժ Սարգսյան-Րաֆֆի Հովհաննիսյան» հանդիպման մասին զրուցեց ընտրական և քաղաքական տեխնոլոգիաների փորձագետ Արմեն Բադալյանի հետ.

-Չեմ կարող ասել, թե կոնկրետ ինչ են քննարկում, քանի որ տվյալ պահին իրենց հետ քննարկման սենյակում չեմ, բայց մի բան հաստատ է. նրանք քննարկում են նախագահական ընտրություններ կոչված միջոցառման հետագա հնարավոր զարգացումները:

Հնարավո՞ր է, որ նրանք քննարկում են Րաֆֆի Հովհաննիսյանի՝ կոալիցիա մտնելու հարցը:

-Րաֆֆի Հովհաննիսյանի կոալիցիա մտնելը  կախված է միայն գործող նախագահ Սերժ Սարգսյանի ցանկությունից և այն բանից, թե ժառանգության անդամները կմտնե՞ն տարբեր կարգավիճակներով կոալիցիա, թե ոչ:

Րաֆֆի Հովհաննիսյանը որոշակի բարձր պաշտոն կստանա՞:

-Դա կախված է գործող Նախագահի ցանկությունից:

Ւսկ կընդունի՞ իրեն առաջարկված պաշտոնը:

-Դա ես չեմ կարող ասել, քանի որ արդեն գուշակություն կլինի, իսկ ես գուշակություններով չեմ զբաղվում:

Ինչպե՞ս կմեկնաբանեք այն փաստը, որ Րաֆֆի Հովհաննիսյանի հանրահավաքին գնացած մարդիկ գոռում են՝ պայքար, պայքար մինչ վերջ:

-Շատ սովորական, մի քանի տարի շարունակ իրենք այդ լոզունգներով են հադես եկել, հիմա էլ շարունակում են:

Չէ՞ որ դա Տեր-Պետրոսյանի հանրահավաքներում հնչող լոզունգն է:

-Նախ ոչ մեկ չի ասել, որ դա Տեր-Պետրոսյանի լոզունգն է, Տեր-Պետրոսյանն այդ լոզունգի հեղինակային իրավունքը չի գրանցել, տարբեր հանրահավաքների ժամանակ կիրառվում էր այդ լոզունգը: Եվ հետո, կարևոր չէ, թե ինչքան մարդ գնա հանրահավաքին, ինչքան չի գնա, եթե համեմատենք 2008 թվականի ընտրությունների հետ, ապա կարող ենք նշել, որ Տեր-Պետրոսյանը բավականին մեծ ընտրազանգված ուներ, իսկ Րաֆիի Հովհաննիսյանն ու Ժառանգությունը չունեն այն հզոր ընտրազանգվածը, որը կարողանա միջացառման արդյունքների վրա ազդել: Չպետք է մոռանալ, որ շատերը քվեարկել են ոչ թե Րաֆֆի Հովհաննիսյանի օգտին, այլ՝ Սերժ Սարգսյանին դեմ:

Ձեր կարծիքով հանրահավաքի հիմնական մասնակիցները Տեր-Պետրոսյանի համակիրնե՞րն են, ովքեր չունենալով ընդդիմության ներկայացուցիչ սատարում են Րաֆֆի Հովհաննիսյանին:

-Ոչ ոք չի կարող ասել, թե հանրահավաքի մասնակիցերը Տեր-Պետրոսյանի համակիրներն են, չի բացառվում, որ այնտեղ լինեն ՀՅԴ-ի կողմնակիցներ, «Ժառանգության» կողմնակիցներ և ոչ կուսակցական մարդիկ, բայց մի բան հաստատ է. Րաֆֆի Հովհաննիսյանին ձայն տվողների մեծամասնությունը քվեարկել են  նրա օգտին ոչ թե հավատալով, որ նա լավ առաջնորդ կլինի, այլ նրանք դժգոհ են եղել իշխանություններից: Օրինակի համար, եթե ՀՅԴ-ն մասնակցեր այս նախօրոք կանխորոշված միջոցառմանը, ապա հրապարակում կլինեին նրանք:

Զրուցեց Սեդա Ղուկասյանը