Այն, ինչ քեզ համար ծիծաղելի է, հնարավոր է, որ ուրիշներին չծիծաղեցնի

Operativ.am-ի թղթակիցը զրուցեց դերասան Գուրգեն Սարգսյանի հետ:

- Ձեր խաղացած դերերը շատ տարբեր են, կերպարները՝ բարդ, հակասական: Խաղացել եք թե' ֆիլմերում, սերիալներում, ներկայացումներում, թե' հումորային հեռուստանախագծում: Եթե առանձնացնենք, որտե՞ղ ավելի շատ ասելիք ունեք և ո՞ր կերպարում:

- Ամեն դեր էլ ունի իր կարևոր իմաստն ու ասելիքը, չեմ կարող առանձնացնել, ուղղակի, որպես հեռուստատեսային ձևաչափ, առանձնացնեմ «32 ատամ»-ը, որտեղ ոչ միայն խաղով ենք ցույց տալիս մեր ասելիքը, այլև ինքներս ենք սցենարը գրում:

- Կան դերասաններ, ովքեր անպարտաճանաչ են, ուշանում են անգամ նկարահանումներից, հարցազրույցներից, ոմանք էլ կռվարար են, նրանց հետ աշխատելը բավականին դժվար է: Եթե անկեղծ՝ ո՞րն է Ձեր թերությունը:

- Կարծում եմ, որ Ձեր նշած թերությունները հարիր չեն պրոֆեսիոնալ դերասանին: Եթե նկատել եք որևէ թերություն, ապա կարող եք անկեղծ ասել:

- «32 ատամ» ակումբում ինչպե՞ս հայտնվեցիք:

- «32 ատամ» ակումբում աշխատել եմ շատ վաղուց, որպես սցենարիստ, իսկ որպես դերասան՝ առաջին անգամ խմբի հետ աշխատել եմ «ՍՏՈՊ» ներկայացման շրջանակներում: Ինձ միշտ էլ հարազատ է եղել «32 ատամ» ակումբը թե´ հումորային ուղղվածությամբ և թե´ նրանով, որ մասնակիցներն ընկերներս են: Այս եթերաշրջանում նրանցից ստացա հրավեր և առանց ձևական չեմուչումների համաձայնվեցի:

- Հումորի բնագավառում աշխատելն ավելի՞ հեշտ է:

- Բնականաբար՝ ոչ, բայց միևնույն ժամանակ՝ հաճելի: Այն, ինչ քեզ համար ծիծաղելի է, հնարավոր է, որ ուրիշներին չծիծաղեցնի:

- Ընտանիքն այն վայրն է, որտեղ սկսվում և վերջանում է օրը: Ինչպե՞ս եք դիմավորում նոր օրը և ավարտում այն:

- Երջանիկ է այն մարդը, ով առավոտյան հաճույքով գնում է գործի, երեկոյան հաճույքով վերադառնում է տուն:

Զրուցեց Մարինե Ամիրյանը