Եղունգները ինչ կարող են ասել մարդու առողջության վերաբերյալ

Առհասարակ, առողջ եղունգը լինում է ամուր, առաձգական, հարթ, փայլուն, վարդագույն ու թափանցիկ: Եթե եղունգները հեռու են իդեալական լինելուց, չարժե ժամանակից շուտ մտահոգվել տարբեր տեսակի լուրջ հիվանդությունների վերաբերյալ: Գուցե պատճառը պարզապես սխալ սննդակարգն է. չափից շատ քաղցրի գործածումն ու անհրաժեշտ ճարպեր ու սպիտակուցներ չստանալը:

Սխալ կամ սահմանափակ սննդակարգը զրկում է եղունգները նախևառաջ օգտակար ամինաթթուներից, որոնցից կազմված է շատ կարևոր կերատին սպիտակուցը, ինչպես նաև այնպիսի պնդացնող տարրերից' ինչպես քրոմը, կալցիումը, ֆոսֆորը, սելենը, ցինկը, երկաթը, սիլիցիումն ու ծծումբը:

Եղունգների ամրապնդման համար շատ կարևոր է սննդի մեջ օգտագործել պանիր, կաթնաշոռ, յոգուրտներ, ժելե, միս (հիմնականում' հավ և հնդկահավ), ձկնեղեն, ծովամթերք, մրգեր և բանջարեղեն, ձավարեղեն, չմշակված բրինձ, ընկույզներ, արևածաղկի և դդմի սերմ: Եթե օրվա ընթացքում բավարար քանակությամբ հեղուկ չես ստանում, կարող են առաջանալ խնդիրներ.խմիր շատ կանաչ թեյ և հանքային ջուր:

Եղունգի շերտը թարմացվում է 3-6 ամսվա ընթացքում և միայն այդ ժամանակահատվածից հետո կարելի է գնահատել տեղի ունեցած փոփոխությունները: