Երգչուհի Անի Քրիստին բուռն ստեղծագործական շրջան է ապրում. բացառիկ հարցազրույց երգչուհու հետ (լուսանկարներ)
Երգչուհի Անի Քրիստին երկար դադարից հետո սկսել է բուռն ստեղծագործական կյանքով ապրել: Հունվարին լույս տեսավ նրա «Դե ասա» երգի տեսահոլովակը, իսկ այսօր՝ փետրվարի 14-ին, «Հավատա» տեսահոլովակը:
Այս առիթով Operativ.am-ի թղթակցը հարցազրույց ունեցավ երգչուհու հետ, ով սիրով պատասխանեց բոլոր հարցերին:
-Ինչպե՞ս ծնվեց «Հավատա» երգը:
- Երգի երաժշտության հեղինակը Արսեն Գրիգորյանն է, բառերի հեղինակը՝ Սվետլանա Բոսնոյանը: Ինձ նման ոճում երգ էր պետք: Միասին լսեցինք երգերը, և 8 երգից ընրեցինք «Հավատա»-ն:
-Ինչո՞վ է այս երգը առանձնահատուկ ձեզ համար:
- Այն գեղեցիկ է, մեղեդային: Չեմ կարող առանձնացնել մյուսներից, քանի որ յուրաքանչյուրն իր տեսակն ու գույնն ունի:
-Գիտենք, որ այս տեսահոլովակում նկարահանվել է Սելենա Գոմեսի տեսահոլովակներից մեկի հերոսը' Նիկո Փեփաջը: Ինչպե՞ս է սկսվել ձեր համագործակցությունը:
-Բարևից,- ժպտում է երգչուհին:- Նիկոյի հետ համագործակցության առաջարկը իմ վարսահարդար Կարեն Մադաթյանինն է: Ավելացնեմ, որ շատ հաճելի ու մարդամոտ տղա էր, կարծես վաղուց էինք ճանաչում միմյանց:
-Որտե՞ղ են անց կացվել նկարահանումները:
- Նկարահանումներն իրականացվել են Խաղաղ օվկիանոսի ափին, Փասադենայի շրջակայաքում և տաղավարում:
-Որևէ զվարճալի կամ հետաքրքիր դեպք կպատմե՞ք նկարահանման ընթացքից:
- Երբ պառկեցի կաթով լի լոգարանի մեջ, զգացի, որ շատ տաք է, սակայն մի փոքր անհարմար զգալով, չբարձրաձայնեցի: Հետո հասկացա, որ կարող եմ ուշաթափվել: Այդ պահին ինձ օգնության հասավ հենց Նիկոն՝ փորձելով հովացնել տարածքը:
-Դժվարություններ և անհամաձայնություններ եղե՞լ են նկարահանման ընթացքում:
- Փառք Աստծո, ոչ: Թեև իմ առաջին համագործակցությունն էր Արթուր Մանուկյանի հետ, բայց և այնպես, շատ ավելի հարթ անցավ, քան կարող էի պատկերացնել: Ամեն ինչ հանգիստ էր, պրոֆեսիոնալ և գրագետ: Մեր համագործակցությունը շարունակվում է, և մենք հիմա պատրաստում ենք ևս 2 տեսահոլովակ, որոնցից մեկը լույս կտեսնի մարտի 15-ին՝ իմ ծննդյան օրը, մյուսը՝ ապրիլին:
-Անի, բուռն ստեղծագորական կյանքով եք ապրում, մենահամերգ նախատեսվա՞ծ է:
- Այո, երբեմն մտածում եմ, որ 24 ժամը ինձ չի բավականացնում, անելիքներ շատ կան: Լոս Անջելեսում իմ առաջին մենահամերգը կկայանա մայիսի 15-ին: Եթե ծրագրերը չփոխվեն, հոկտեմբերին մենահամերգ կունենամ նաև Հայաստանում:
- Առհասարակ, ձեր տեսահոլովակների կամ ձայնագրությունների ընթացքում ռեժիսորի՞ , թե Ձեր գաղափարներն են գերակշռում:
- Ես տեսակով ավելի շատ համագործակցության կողմնակից եմ, քան միակարծության:
- Ամենաշատը ձեր ո՞ ր կերպարն է ձեզ դուր գալիս:
- Բոլորը: Ես սիրում եմ փոփոխվել, այդպես էլ անում եմ ՝ ըստ տարիների և թելադրող ճաշակի: Երբ նայում եմ հին տեսահոլովակներս, կերպարներս ինձ խորթ են թվում, հասկանում եմ, որ ժամանակի թելադրանք է եղել, իսկ երբ առաջ եմ նայում, ամեն բան այլ է:
- Ինչպե՞ս եք վերաբերվում ձեր և ձեր աշխատանքի մասին հնչած բացասական կարծիքներին:
- Առողջ քննադատությանը միշտ կարող եմ նորմալ վերաբերվել, առանց դրա չես կարող կայանալ: Ինքս էլ ինքնաքննադատ եմ, սակայն կան մարդիկ, ովքեր փորձում են գիտակ ձևանալ, և քննադատելը օգնում է նրանց ինքնահաստատվել:
- Անի, ձեր երգացանկում օտարալեզու երգեր չկան, ինչո՞վ է դա պայմանավորված:
- Կարևորը՝ երգը ասելիք ունենա, լեզուն էական չէ: 11 տարեկանում, երբ առաջին մրցանակը ստացա, մեկ փառատոնի ընթացքում երգում էի 4 լեզվով՝ հայերեն, ռուսերեն , անգլերեն, ֆրանսերեն:
Այլ լեզվով երգեր ունենալու ծրագրեր ևս կան, սակայն չեմ ուզում բացել բոլոր փակագծերը:
- Շնորհակալ ենք հաճելի ու բովանդակալից զրույցի համար:
-Խնդրեմ: Ափսոս, որ Երևանում չեմ և չեմ կարողանում հայ հանդիսատեսին ներկայացնել իմ երգերը համերգների ժամանակ, և շփումը դեռևս մնում է միայն ինտերնետի միջոցով:
Օperativ.am-ը շնորհավորում է Անի Քրիստիին՝ նոր տեսահոլովակի կապակցությամբ, և մաղթում նրան նորանոր հաջողություններ: Տեսահոլովակը կներկայացնենք մի փոքր ուշ:
Զրուցեց՝ Կարինե Գևորգյանը