«Հայաքվե» միավորման անդամները հանդիպում ունեցան արցախցիների հետ

Այսօր՝ ապրիլի 15-ին, ՀՀ փոխվարչապետ Տիգրան Խաչատրյանը հանդիպում-քննարկում ունեցավ Արցախցիների իրավունքների պաշտպանության խորհրդի ներկայացուցիչների հետ։ Հանդիպում-քննարկման նախաձեռնությունը եղել է փոխվարչապետ Տիգրան Խաչատրյանի կողմից։

Նշենք, որ հանդիպման ժամանակ քննարկվել է Խորհրդի կողմից ներկայացված պահանջագրի 12 կետերը։

Հանդիպումից անմիջապես հետո, Ազատության հրապարակում տեղադրված Արցախցիների իրավունքների պաշտպանության շտաբ-վրանում Խորհուրդը հանդես եկավ ճեպազրույցով, որի ժամանակ Խորհրդի անդամ Նժդեհ Իսկանդարյանը քննարկումից ներկայացրեց հետևյալը.

«Այսօր, ցավոք, մեր այն հիմնավոր փաստարկները չեն ընդունվել ավելի երկարաժամկետ լուծումներ տալու համար։ Իրենց կողմից ևս եղել են առաջարկներ, որոնք մենք չենք ընդունել, բայց համաձայնության եզրեր, այնուամենայնիվ, եղել են։ Կառավարությունը պատրաստ է ևս երկու ամսով 40 հազար դրամ աջակցությունը տրամադրել։ Կարող ենք ասել, որ հետքայլ եղել է մասնակի։ 50 հազար դրամ աջակցության ծրագրի մասին խոսք լինել չի կարող, միայն 40 հազար դրամ յուրաքանչյուր անձի համար»։

Իսկանդարյանը նաև տեղեկացրեց, որ Խորհրդի ներկայացրած պահանջագրի 11 կետերի առնչությամբ ձեռնարկելու են բազմաթիվ քայլեր։ Նրա խոսքով՝ հանրահավաքի մասի հայտնելու են 2-3 օր Խորհուրդի կազմի և արցախցիների հետ համատեղ քննարկումից հետո։ Արցախցիների իրավունքների պաշտպանության խորհուրդի շտաբ-վրանն էլ շարունակելու է գործել Ազատության հրապարակում։

«Վրանը, բնականաբար, շարունակելու է մնալ այստեղ և դրա մասին խոսք լինել չի կարող; Մենք հստակ մեր դիրքորոշումը ասել ենք՝ սա միայն սոցիալական պահանջ չէ, մենք խոսելու ենք հավաքական վերադարձի, գերիների հարցի մասին, ու մեր պայքարը շարունակվելու է։ Ձևաչափը միգուցե կարող է փոխվել, բայց պայքարը շարունակվելու է»,- վստահաբար ասաց Նժդեհ Իսկանդարյանը։

Հիշեցնենք, որ մարտի 29-ին արցախցիների կողմից իրականացված մեծ հանրահավաքից անմիջապես հետո Արցախցիների իրավունքների պաշտպանության խորհուրդը վրան տեղադրեց Ազատության հրապարակում, որն այժմ ծառայում է որպես շտաբ, և սկսեց անժամկետ նստացույց։ Նստացույցի ժամանակ բազմաթիվ հանդիպում-քննարկումներ տեղի ունեցան Խորհուրդի ներկայացուցիչների հետ՝ ինչպես Արցախի, այնպես էլ հայաստանյան քաղաքական ուժերի, հասարակական կազմակերպությունների հետ։

Քննարկումներ տեղի ուենցան «Արդարություն և վերադարձ» ՀԿ, ՀՅԴ կուսակցության, «Ազատ հայրենիք» կուսակցության, «Միասնական հայրենիք» կուսակցության անդամներ, ՀՀ ԱԺ «Հայաստան» խմբակցության, «Պատիվ ունեմ» խմբակցության պատգամավորներ, «Թեքեյան» կենտրոնի ներկայացուցիչներ, «Հայաքվե» ազգային քաղաքացիական միավորման անդամներ։

Հիշեցնենք, որ այս ընթացքում Խորհրդի ներկայացուցիչներին առաջարկ եղել է մեկ ամսով տրամադրել արցախցիներին 40+10 հազար դրամական աջակցությունը, միայն թե հավաքեն Ազատության հրապարակում տեղադրված վրանը։ Սա ևս մեկ անգամ փաստում է, որ գործող իշխանությունը միայն ուժի լեզուն է հասկանում և, որ հանրային ճնշմամբ հնարավոր է սայլը տեղից շարժել։

Մանրամասները՝ տեսանյութում։