Որոնք են ծերացումն արագացնող գործոնները

Սպիտակուցի անբավարարությունը, քնի խանգարումը, ֆոտոծերացումը և քրոնիկական բորբոքումներն արագացնում են օրգանիզմի ծերացումը, ասում է սննդաբան Եկատերինա Շիրշովան։ Նա gazeta.ru-ի հետ զրույցում անվանել է այս գործոնների զարգացումը դանդաղեցնելու ուղիներ:

Շիրշովան նշել է, որ գլիկացիան հյուսվածքների վնասման գործընթաց է, որն առաջանում է շաքարի և արագ ածխաջրերի ավելցուկային սպառման հետևանքով: Ինչպես պարզաբանել է սննդաբանը, դրանք հրահրում են վնասակար նյութերի արտադրություն, որոնք քայքայում են կոլագենն ու էլաստինը, նվազեցնում մաշկի առաձգականությունը և վատթարացնում անոթների վիճակը։ Այս գործընթացը դանդաղեցնելու համար Շիրշովան խորհուրդ է տվել չչարաշահել քաղցրեղենը և նախապատվությունը տալ դանդաղ, քան արագ ածխաջրերին։

Մասնագետը ծերացումը արագացնող երկրորդ գործոնն անվանել է օրգանիզմի սպիտակուցի մակարդակի աստիճանական նվազումը։ Նրա խոսքով, դրա պատճառով մկանային զանգվածի քանակը նվազում է, ոսկորները կորցնում են խտությունը և խաթարվում է կոլագենի արտադրությունը։

«Օպտիմալ լուծումը կլինի չափավոր սպիտակուցի օգտագործումը. 60 տարեկանից ցածր մարդկանց համար խորհուրդ է տրվում 1,2-1,6 գրամ սպիտակուց մեկ կիլոգրամ քաշի համար, իսկ 60 տարեկանից հետո՝ 0,8-1,2 գրամ՝ կանոնավոր ֆիզիկական ակտիվության դեպքում»,-Shantnews-ի փոխանցմամբ՝ ասել է մասնագետը:

Շիրշովան նաև նշել է, որ քնի քրոնիկ պակասի դեպքում օրգանիզմն ավելի արագ է հյուծվում, քանի որ ժամանակ չունի վերականգնվելու։ Ժամանակի ընթացքում դա հանգեցնում է իմունային ֆունկցիայի վատթարացման և բջիջների աստիճանական վնասման: