ԱՄՆ-ի կողմից մաքսատուրքերի բարձրացումը կարող է վերաբերել Հայաստանից ադամանդի ներմուծմանը․ Սուրեն Պարսյան

Անցյալ տարի Հայաստանից Ամերիկայի Միացյալ Նահանգներ հիմնականում ներմուծվել է ադամանդ մոտ հարյուր տաս միլիոն դոլարի չափով, եւ մաքսատուքերի այս տաս տոկոսի բարձրացումը կարող է վերաբերել այս ադամանդի ներմուծմանը եւ կարող է ադամանդը թանկանալ տաս տոկոսով։ Այս մասին NEWS.am-ի հետ զրույցի ժամանակ ասաց տնտեսագետ Սուրեն Պարսյանը։

Նրա խոսքով՝ սա է Հայաստանից արտահանվող հիմնական ապրանքը վերջին տարիների ընթացքում։

«Մենք նախկինում, օրինակ, արտահանում էինք փայլաթիթեղը, որը դարձյալ դադարեցվեց այն պատճառով, քանի որ Ամերիկայի Միացյալ Նահանգները սահմանեց հակադեմպինգային տուրք, եւ Հայաստանից արտահանվող փայլաթիթեղը ներկրելիս պետք է այդ հակադեմպինգային տուրքը վճարվեր։ Եւ դարձյալ դարձավ ոչ մրցունակ եւ դուրս եկավ։ Թե այդ տաս տոկոսի տուրքը որքան կարող է ազդել ադամանդի արտահանողների գործունեության վրա, այս պահին վաղ է ասել, քանի որ բազմաթիվ գործոններ են ազդում այդ որոշման վրա։ Այսինքն ոչ միայն Հայաստանից արտահանվող ադամանդնէ թանկացել, այլ նաեւ այլ երկրներից են թանկացումներ եղել։ Դիցուք Չինաստանի պարագայում քսան տոկոս է եղել, այլ երկրների պարագայում՝ մինչեւ ութսուն տոկոս։ Իսկ այս խնդիրը կայանում է նոր իրավիճակում հայկական ադամանդը ինչ գին կունենա ամերիկյան շուկայում», - ասաց տնտեսագետը։

Նշենք, որ ԱՄՆ նախագահ Դոնալդ Թրամփը մաքսատուրքեր է սահմանել բոլոր ապրանքների համար։

ԱՄՆ-ի մաքսատուրքերը նախկին Խորհրդային Միության երկրների համար կհասնեն 31%-ի՝ սա այն մաքսատուրքն է, որը Թրամփը սահմանել է Մոլդովայի համար։ Երկրների մեծ մասի համար, որոնց թվում է նաեւ Հայաստանը, ներդրվել է 10% դրույքաչափ։ Ուկրաինայի համար՝ 10%։ Ռուսաստանը չի հիշատակվում ԱՄՆ նախագահ Դոնալդ Թրամփի կողմից նախկին ԽՍՀՄ երկրների համար մաքսատուրքերի տարբեր մակարդակների մասին։