Էստոնիայի ԱԳ նախարարն ընդունել է Հայաստանի ԲՏԱ նախարարության պատվիրակությանը

ՀՀ բարձր տեխնոլոգիական արդյունաբերության նախարարության նախաձեռնությամբ և էստոնական «Proud Engineers» թվային վերափոխման խորհրդատվական ընկերության հրավերով թվայնացման լավագույն փորձին ծանոթանալու նպատակով Էստոնիայում գտնվող ՀՀ ԲՏԱ նախարար Մխիթար Հայրապետյանի գլխավորած պատվիրակությանն ապրիլի 2-ին ընդունել է Էստոնիայի ԱԳ նախարար Մարգուս Ցահքնան:

Հանդիպման ընթացքում կողմերն անդրադարձել են նախորդ այցերի, հանդիպումների և քննարկումների արդյունքում ձևավորված ոլորտային համագործակցության լայն ու բազմաբնույթ օրակարգին՝ կարևորելով երկկողմ հարաբերությունների խորացման ու զարգացման ներուժը, փորձի շարունակական փոխանակումը, համատեղ ծրագրերի մշակումը, ինչպես նաև համագործակցության նոր հնարավորությունների բացահայտումը։

ՀՀ ԲՏԱ նախարարությունից հայտնում են, որ քննարկվել են նաև երկկողմ օրակարգի հիմնական ուղղությունները՝ մասնավորապես թվայնացումը, կիբեռպաշտպանությունը և արհեստական բանականության կարգավորումները։ Կողմերն ընդգծել են նշված ոլորտներում սերտ և շարունակական համագործակցությունն առավել արդյունավետ դարձնելու անհրաժեշտությունը։

Հանդիպումից հետո պատվիրակությունը մասնակցել է Էստոնիայի արտաքին գործերի նախարարության գրասենյակում ընթացող քննարկումներին:

Քննարկումների ընթացքում հնչել են զեկույցներ, որոնց ընթացքում ներկայացվել են Էստոնիայի առաջատար թվային լուծումները՝ ներառյալ հարկային հայտարարագրերի և մաքսազերծման ավտոմատացումը, արհեստական բանականությամբ ղեկավարվող սոցիալական ապահովության և աշխատանքային համապատասխանության հարթակները, նպաստների բաշխման և խարդախության կանխման մեխանիզմները, ինչպես նաև էլեկտրոնային դատարանների և գործերի կառավարման համակարգերը։

ՀՀ ԲՏԱ նախարար Մխիթար Հայրապետյանի գլխավորած պատվիրակության այցի նպատակն է տեղում ուսումնասիրել Էստոնիայի առաջադեմ փորձը թվային կառավարման, կիբեռանվտանգության և հանրային ծառայությունների թվայնացման ոլորտներում, ինչպես նաև կազմակերպել առարկայական քննարկումներ Հայաստանի և Էստոնիայի միջև երկկողմ համագործակցության խորացման ուղղությամբ։