Lրիվս տեղում ենք, մենք տյուս չենք կյալու՝ թորքի կլոխը թաղեմ․ Խնածախի բնակչուհի

«Թորքերը կրակում են՝ գիշերը 22.40 կրակալ են, ջիգյար, կրակալ ան մինչև առավոտը 04.30՝ արանք-արանք կրակում են», «Հրապարակի» հետ զրույցում ասաց Սյունիքի մարզի Տեղ համայնքի Խնածախ գյուղի բնակչուհին: Գյուղի տների դուռ-պատուհաններն են վնասել, տներից մեկի վրա են կրակել, «բայց փառք Աստծու, մարդկային վնաս չունենք»,-տեղեկացրեց Խնածախի բնակչուհին:

Խնախածի տների ուղղությամբ թշնամու կրակոցների մասին հաղորդագրություն է տարածել նաեւ Պաշտպանության նախարարությունը:

Փորձեցինք կապ հաստատել Խնածախի վարչական ղեկավար Սեյրան Միրզոյանի հետ, սակայն նա մեր զանգերին այդպես էլ չպատասխանեց, միայն Խնածախի բնակչուհու հետ զրույցից տեղեկացանք, որ հենց գյուղապետի տունն է վնասվել։

Սակայն, սա միակ տեղեկությունը չէր, որ ստացանք Խնածախի բնակչուհուց: Մեզ ասացին, որ շփման գոտում ապրող սյունեցիներին զգուշացնում, հրահանգում են, որ ադրբեջանցիների կողմից կրակոցները իրենց համայնքից դուրս ոչ մեկի հետ չքննարկեն, տեղեկություն չտարածեն:

«Առանց անուն գրիր, նեղություն են տալիս, ջիգյար: Մեզ ասում են՝ մի ասեք, որ կրակում են: Անվտանգությունը մեզ նեղություն է տալիս, կանչում են, ասում են՝ մի ասեք, որ կրակում են, ժողովուրդը վախենում են, որ խոսեն»,-ասաց խնածախցին:

Նույն տեղեկությունը մեզ հաղորդեցին նաև Սյունիքի մարզի տեղ համայնքի Տեղ բնակավայրից: Բնակիչներից մեկն ասաց, որ գյուղացիների համար գլխացավանք է դառնում, եթե պարզվում է, որ համայնքից դուրս որևէ մեկի հետ կրակոցների մասին խոսել ենք կամ տեղեկացրել․ «Կանչում են, նեղում են, մարդկանց տհաճություն են պատճառում»: Իսկ Խնածախցիները շարունակո՞ւմ են գյուղում մնալ` թշնամու բացած կրակից հետո, ասաց․ «Մեր գյուղը լոխ տեղում ա, դպրոցը աշխատում է, մանկապարտեզը աշխատում է՝ մենք լրիվս տեղում ենք, մենք տյուս չենք կյալու՝ թորքի կլոխը թաղեմ»։

Խնածախի բնակչուհու խոսքը որոշեցինք ներկայացնել Սյունիքի բարբառով՝ առանց փոփոխության: