Իմ թիմակիցների վրա վստահ եմ` չեն միանա ՔՊ-ին և չեն օգնի Սարիկ Մինասյանին ընտրվել. Կարեն Սիմոնյան

Մենք, իհարկե, վստահ ենք մեր թեկնածուների վրա, եթե վստահ չլինենք, չէինք մտնի այս պայքարի մեջ: Այս մասին, այսօր՝ մարտի 31-ին, մամուլի ասուլիսի ժամանակ նշեց «Մայր Հայաստան» դաշինքի կողմից Գյումրիի քաղաքապետի թեկնածու առաջադրված Կարեն Սիմոնյանը՝ անդրադառնալով դիտարկմանը, որ ըստ որոշ տեղեկությունների, ընդդիմադիր ուժերի ցուցակներում կան, այսպես ասած, թաքնված ծպտյալ ՔՊ-ականներ, և հնարավոր է նրանք օգնեն Սարիկ Մինասյանին քաղաքապետ դառնալ, արդյոք իրենց ցուցակում այդպիսիք կան:

«Մեր թիմը շատ լավն է, մեր երիտասարդները հիանալի են, անգամ բռնաճնշումների օրը ինքնակազմակերպեցին և փողոցային պայքարի միջոցով ցույց տվեցին, որ իրենք որևիցե պարագայում կոտրվողը չեն: Իսկ այդպիսի թիմից ակնկալել որևիցե դավաճանական քայլ, հենց դա է դավաճանական մոտեցումը։

Ես օգտվելով առիթից նաև շնորհակալություն եմ հայտնում բոլոր գյումրեցիներին, բոլոր ընդդիմադիր միավորներին քվե տված գյումրեցիներին, որ հենց միացան մեր կոչին և ձայնը տվեցին ընդդիմադիր ուժերին:

Շնորհակալ ենք նաև «Մայր Հայաստան» շարժմանը, շարժման առաջնորդ Անդրանիկ Թևանյանին, ով նաև և խոսք է տվել և հայտարարել է, որ ամբողջական իշխանափոխությունից հետո Գյումրիի զարգացումը իր համար և «Մայր Հայաստան» շարժման համար լինելու է առաջին պլան։

Այս ամբողջ գործընթացի ընթացքում բազմիցս մենք ապացուցեցինք գյումրեցիներին, որ մենք որևէ ակնկալիք, կուլիսային պայմանավորվածության կողմնակից չենք և գնում ենք միմիայն պաշտպանելու գյումրեցիների շահերը և մեր մանդատները օգտագործելու այն քաղաքացիների համար, որոնց իրավունքները քաղաքապետարանում, ընդհանրապես կից կառույցներում և քաղաքում ոտնահարվելու են»:

Նշենք, որ Գյումրիում նախնական արդյունքներով ավագանի են անցնում 5 ուժեր: ՔՊ-ն կստանա 14 մանդատ, Վարդան Ղուկասյանը՝ 8 մանդատ, Մարտուն Գրիգորյանը՝ 6 մանդատ, Ռուբեն Մխիթարյանը՝ 3 ամնդատ եւ «Մայր Հայաստանը»՝ 2 մանդատ:

Սա նշանակում է, որ առանց Մարտուն Գրիգորյանի երեք ընդդիմադիր ուժերով հնարավոր չի լինելու իշխանության ձեւավորել: