Ի՞նչ վիճաբանություն է եղել անհետ կորածների ծնողների և պատգամավորի միջև

Անհետ կորած զինծառայողների ծնողները խորհրդարանում մասնակցել են փակ քննարկման, որը կազմակերպել է ԱԺ պաշտպանության եւ անվտանգության հանձնաժողովը՝ մասնակցությամբ նաև ԱԱԾ ղեկավարի, պաշտպանության փոխնախարարների եւ այլ ուժային կառույցների ներկայացուցիչների։

Հանդիպման ընթացքում լարվածություն և վիճաբանություն է առաջացել ծնողների և պատգամավոր Գեղամ Նազարյանի միջև:

«Հանդիպմանը ներկա, անհետ կորած զինվորներից մեկի հարազատը հարց ուղղեց ՔԿ նախագահին, թե ինչ է մտածում, ինչ պետք է արվի այն տղաների մարմինների հետ, որոնց ծնողները հրաժարվում են ընդունել, որ դա իրենց որդիների մարմիններն է: ՔԿ նախագահը այլ պատասխան տվեց, ես ընդհատեցի, ասեցի՝ եթե կարելի ա, պարզաբանեմ՝ ինչ ա հարցնում։

Ասեցի՝ ի՞նչ անենք, եթե մարդիկ հոգեբանական տեսանկյունից չեն ուզում ընդունել իրականությունը։ Այդ ընթացքում մի քանի ծնողներ վրդովվեցին՝ ինչու եմ ես նման բան ասում։ Ես ուղղակի այդ կնոջ հարցը վերաձևակերպեցի, որ պարոն Պողոսյանի համար ավելի ընկալելի լինի»,- իրավիճակը պարզաբանել է պատգամավորը:

Գեղամ Նազարյանի հասցեին վիրավորական արտահայտություններ են հնչել նաև:

«Որ իրավիճակը չլարվի, դուրս եկա, ասացի՝ եթե ինչ-որ ասելիք ունեք, եկեք դուրսը ասեք»,- ասել է Նազարյանը։