Վարդան Ղուկասյանի ու Մարտուն Գրիգորյանի համաձայնությունը կայացե՞լ է

Դեռ ընտրությունների փուլում էր քննարկվում այս հարցը, թե` եթե երկու ընդդիմադիր ուժերը միասին ավելի շատ ձայն են հավաքում Գյումրիում, քան իշխող կուսակցությունը, ինչպե՞ս կպահեն իրենց Վարդան Ղուկասյանն ու Մարտուն Գրիգորյանը, որոնց ներկլանային տարիների թշնամանքի մասին բոլորն են տեղյակ: Իսկ ընտրությունների արդյունքների հրապարակումից հետո արդեն այդ խոսակցությունները տեղափոխվեցին ավելի առարկայական դաշտ եւ տարբեր ուժեր ու անձինք սկսեցին համոզել, բանակցել, քննարկել երկու առաջատար ուժերի միջեւ դաշինք կնքելու հարցը, գրում է «Հրապարակ»-ը։

Մենք արդեն գրել ենք, որ համախմբումն անհնարին էր թվում եւ բազմաթիվ խոչընդոտներ կային դրա ճանապարհին, ուստի շատերը թերահավատ էին, որ այդ թշնամանքը կկարողանան հաղթահարել եւ գալ ընդհանուր հայտարարի: Բայց գիշերը, ապա այսօր վաղ առավոտից ընթացող բանակցությունները կարծես թե արդյունք են տալիս:

Մեր տեղեկություններով, որոնք դեռեւս պաշտոնապես չենք կարողացել ճշտել, ինչ-որ համաձայնություն արդեն կայացել է երկու անձանց միջեւ եւ հանգնել են մի կոմպրոմիսային տարբերակի. որ ոչ թե կոալիցիա են կազմում միմյանց հետ, այլ Մարտուն Գրիգորյանի ավագանին 2 պակասող ձայն է տալիս Վարդան Ղուկասյանին, որ նա համայնքապետ ընտրվի: 

Նորից շեշտենք` դեռ այս տեղեկությունները պաշտոնապես չեն հաստատվել, հնարավոր է, որ վերջին պահին այս համաձայնությունը չկայանա, այլ տարբերակի վրա կանգնեն կողմերը, կամ` առհասարակ չգան համաձայնության: