Գյումրու 31/66 տեղամասում 1600 ընտրողից քաղաքացիական պարտքը կատարել է մոտ 700-ը

«Լուրերի» թղթակից Վարդուհի Արզումանյանն այսօր եղել է Գյումրիի 4 ընտրատեղամասերում՝ 31/3, 31/27, 31/66, 31/70: Նա տեղեկացրել է, որ օրվա ընթացքում այն տեղամասերում, որոնք տեղակայված էին թաղային հաստատություններում, ընտրողների առավել մեծ ակտիվություն էր, մյուս տեղամասերում կեսօրից հետո է ակտիվություն նկատվել։

31/66 տեղամասում իրավիճակը ներկայացնելով՝ նա հայտնել է, որ տեղամասում գրանցված է մոտ 1600 ընտրող, որոնցից մոտ 700-ն է կատարել իր քաղաքացիական պարտքը, նրանցից երկուսն ընտրել են լրացուցիչ ցուցակներով․ մեկը անունը չի եղել ցուցակներում, նա միգրացիայի և քաղաքացիության ծառայության միջոցով ստացված տեղեկանքով է կատարել քաղաքացիական պարտքը, մյուս քաղաքացու անունը եղել է ցուցակում, սակայն սարքավորման մեջ մուտքագրված չի եղել, նա ևս իր պարտքը իրացրել է տեղեկանքի միջոցով։

Օրվա ընթացքում այս տեղամասում հոսանքի լարերը վնասվել են, որի պատճառով մոտ քսանհինգ րոպեով դադարել է ուղիղ հեռարձակումը, սակայն արագ վերականգնվել է։ Հանձնաժողովի նախագահը վստահեցրել է՝ այդ ընթացքում այնտեղ եղել են դիտորդներ, վստահված անձինք, խախտումներ չեն արձանագրվել։

20։00-ին սահմանված կարգով ՏԸՀ-ն դադարեցրել է ընտրությունների ընթացքը, այժմ նախապատրաստվում են արդյունքների ամփոփմանը։