Մամուլում առկա որոշ հրապարակումների մասով դատախազությունը ուսումնասիրություններ է սկսել

Գյումրիում և Փարաքարում ընթացող ՏԻՄ արտահերթ ընտրություններին առնչվող մամուլում առկա տեղեկությունների և մի քանի հրապարակման մասով Գլխավոր դատախազությունը ուսումնասիրություններ է սկսել:

Այս մասին «Հայկական ժամանակ»-ին հայտնել են դատախազությունից:

Այդ հրապարակումներից մեկն առնչվում է Մարտուն Գրիգորյանի գլխավորած «Մեր քաղաքը» դաշինքի անդամին առևանգելու ահազանգին, որում առկա տեղեկատվությունը ՆԳՆ-ն հերքել է, իսկ Հակակոռուպցիոն կոմիտեն՝ պարզաբանել, որ ավագանու անդամը ձերբակալվել է անմիջականորեն ծագած կասկածի հիմքով, ոչ թե առևանգվել:

Մեկ այլ հրապարակման համաձայն՝ մարզպետարանի աշխատակից ներակայացած անհայտ կինը Գյումրիում իր հետ ընտրական տեղամաս է բերել մի խումբ անձանց: Նմանատիպ այլ հրապարակման բովանդակության մեջ նշվում է, թե մեքենաներով մարդիկ են բերվել Փարաքարի ընտրական տեղամասերից մեկը:

Դատախազության ուշադրության կենտրոնում է հայտնվել ևս մեկ հրապարակում՝ համաձայն որի, մայրը քվեարկել է անգործունակ ճանաչված որդու փոխարեն:

Հնչեղություն ստացած ևս մեկ դեպք Գյումրիում, երբ քաղաքացին պատռել, շպրտել էր ծրարը, ստացել նույնականացման կտրոնն ու այն իր հետ տանելով դիմել փախուստի, ևս դատախազությունը վերցրել է ուսումնասիրության:

Հրապարակումներից հաջորդն այն մասին է, որ Գյումրիի ընտրատեղամասերից մեկում ընտրողները ցանկացած գնով 8 թվի քվեաթերթիկը դուրս են բերել ընտրատեղամասից, ևս մեկ հրապարակում էլ «Ձյունիկ» մանկապարտեզի դիմաց ընտրողներին ուղղորդելու ահազանգի մասին է:

Մամուլում լայնորեն տարածված մեկ այլ հրապարակում այն մասին, որ Գյումրու ծերերի տան տնօրենը իր հաստատության խնամքի տակ գտնվող ծերերին ստիպողաբար ուղորդել է քվեարկել Մարտուն Գրիգորյանի օգտին, ևս դատախազության ուշադրության և ուսումնասիրության կենտրոնում է: