Արամն իմ սանիկն է. տունս նորոգելու համար պարտքով փող է տվել, ես վերադարձրել եմ. մի քանի հոգու էլ փրկել եմ. Աղազարյան

Այս գործը բացվել է այլ գործերից. երկու հատ շատ ծանր մեղադրանքներով գործերից. Երկու հոգի մի տեղ իրար հետ խոսել են, իմ փոխարեն պայմանավորվել են, իմ փոխարեն որոշել են: Այս մասին, այսօր՝ մարտի 26-ին, ԱԺ-ում լրագրողների հետ զրույցում նշեց ԱԺ պատգամավոր Հովիկ Աղազարյանը:

«Երբ ես ծանոթացա նյութերին, պարզվեց, որ ուրիշ բաներ էլ են տեղի ունեցել, որի մասին իմ ելույթում կասեմ»,-ասաց նա:

Դիտարկմանը, որ ինքը ցուցմունքներում չի ժխտել, որ գումար է վերցրել, Աղազարյանն ասաց. «Արամ Մկրտչյանն իմ սանիկն է, 47-48 տարեկանում ամուսնացավ, ես դառնա իր հարսանիքի քավորը: Եվ երբ որ ես տուն էի վերցրել հիպոթեկով, վերանորոգման համար, մենք ընտանիքներով շփվում էինք, տեսա, որ որոշակի դժվարություններ ունեմ, տարբեր չափերով 8000 դոլար ինձ պարտքով փող է տվել, որը փաստաթղթավորված ես վերադարձել եմ իրեն: Երբեք ինքը ինձ չի ասել՝ 23 000 դոլար պարտք եք, պարոն Աղազարյան:

Հեռախոսի բան է հայտնաբերվել, որ Արամ Մկրտչյանը գրել է Հայկ Նազարյանին, որ Աղազարյան Հովիկին փող եմ տվել 23 000 դոլար, իբրև թե, և ինքը չի արել այդ գործը, փողն էլ հետ չի տալիս:

Արամ Մկրտչյանը հինգ տարի դատապարտված է եղել, հիմա իր վրա դատ է գնում, բայց ինքը փախուստի մեջ է, մարդկանց խաբել է, մի քանի հոգու ես փրկել եմ, փաստորեն, իր հետ ծանոթանալով։ Դարձանք քավոր, հետո նոր իմացանք: Վարորդական իրավունքների հետ կապված հայտնի գործ է դա, մոտ կարծեմ մի 50-60 քաղաքացու անօրինական վարորդական իրավունքներ են տրամադրել, և այդ գործով Հակակոռուպցիոն կոմիտեն լսել է այդ մարդկանց հեռախոսազրույցները, եւ այդտեղից պարզվել է, որ իմ անունը տվել են»: