«Կրթվելը նորաձև է» շարժման հերթական հանդիպումը՝ Վարդենիսում. ո՞ր համայնքներում և ե՞րբ են նախատեսված այցեր

Մարտի 21-ին Վարդենիսի Մհեր Մկրտչյանի անվան մշակույթի պալատում կայացել «Կրթվելը նորաձև է» շարժման 20-րդ հանդիպումը՝ ՀՀ վարչապետի տիկին և «Իմ քայլը» հիմնադրամի գործադիր տնօրեն Աննա Հակոբյանի մասնակցությամբ։

Ինչպես հայտնում են հիմնադրամից, հանդիպմանը ներկա է գտնվել 450 մասնակից:

«Տիկին Հակոբյանը հանդես եկավ իր ելույթով, որին հաջորդեց մշակութային փոքրիկ ընդմիջում, որի ընթացքում Վարդենիսի մշակույթի տան սաները և «Ծովակ» պարային համույթի երիտասարդները հանդես եկան երաժշտական, պարային և ասմունքի համարներով։ Հատկանշական էր, որ հենց 17-ամյա ասմունքող Տաթև Կարոյանն էլ, տիկին Աննա Հակոբյանի առաջարկով, ընկերակցեց նրան որպես հաղորդավար հարցուպատասխանի ընթացքում:

Վարդենիսցիները մեծ ջերմությամբ հյուրընկալեցին տիկին Աննա Հակոբյանին: Հանդիպմանը ներկա էին նաև Գեղարքունիքի այլ համայնքների բնակիչներ, ովքեր տիկին Աննա Հակոբյանի և «Իմ քայլը» հիմնադրամի էջերում տեսած հայտարարությունից հետո էին որոշել միանալ հանդիպմանը։ Շատերը պատրաստակամություն հայտնեցին մասնակցել շարժման առաջիկա միջոցառումներին և նախաձեռնություններին։

Հատկանշական էր, որ ներկա ձեռներեց կանանցից մեկը, ոգեշնչվելով շարժման գաղափարներից, ցանկություն հայտնեց տարածել այն գյուղաբնակ կանանց շրջանում։

Տիկին Հակոբյանը հանդիպման ավարտին ներկայացրեց նաև շարժման մասշտաբները, մի քանի կարևոր վիճակագրական տվյալներ, ինչպես նաև առաջիկա մարզային հանդիպումների օրերը՝ ընդլայնելով շարժման շրջանակները դեպի նոր համայնքներ:

Մարտի 29- Քասախ

Ապրիլի 5 - Արմավիր

Ապրիլի 8 - Երևան

Ապրիլի 12 - Մեղրի

Ապրիլի 19 - Թալին

Շարժմանը մասնակցելու և առաջիկա միջոցառումների և նախաձեռնությունների մասին առաջինը իմանալու համար խնդրում ենք լրացնել հետևյալ հայտը`

https://forms.gle/14TU9paSzmZrKeps5 »,- ասվում է հաղորդագրության մեջ: