Տեղի է ունեցել ՀՀ-ում թրաֆիքինգի և շահագործման դեմ պայքարի հարցերով խորհրդի աշխատանքային խմբի հերթական հանդիպումը

Աշխատանքի և սոցիալական հարցերի նախարարությունում տեղի է ունեցել ՀՀ-ում թրաֆիքինգի և շահագործման դեմ պայքարի հարցերով խորհրդի աշխատանքային խմբի հերթական հանդիպումը։

Քննարկմանը մասնակցել են ԱՍՀ նախարարի տեղակալ Տաթևիկ Ստեփանյանը, ՀՀ ներքին գործերի նախարարի տեղակալ Արմեն Ղազարյանը, շահագրգիռ գերատեսչությունների, ոլորտում ակտիվ մասնակցություն ունեցող հասարակական կազմակերպությունների ներկայացուցիչներ։

Հանդիպման օրակարգում ՀՀ-ում 2023-2025թթ․ ընթացքում մարդկանց թրաֆիքինգի կամ շահագործման դեմ պայքարի կազմակերպման ազգային ծրագրի 2024 թ․ հաշվետվության և շահառուներին տրամադրված աջակցությունների շրջանակում իրականացված աշխատանքների ներկայացումն էր, ինչպես նաև Եվրոպայի խորհրդի մարդկանց թրաֆիքինգի դեմ պայքարի հարցերով փորձագիտական խմբի (GRETA) Հայաստան այցին ընդառաջ՝ վերջինիս հանձնարարականների շրջանակում իրականացված աշխատանքների ամփոփումը։

Կարևորելով մարդկանց թրաֆիքինգի կամ շահագործման հետ կապված երևույթների կանխարգելման և դրանից բխող խնդիրների արդյունավետ լուծման մեխանիզմների գործարկումը՝ նախարարի տեղակալ Տաթևիկը Ստեփանյանը նշել է, որ այդ աշխատանքներում պետության հետ մեկտեղ մեծ է նաև գործընկեր հասարակական կազմակերպությունների դերը։ Վերջինիս խոսքով՝ հասարակության յուրաքանչյուր անդամի մասնակցությունը մարդկանց թրաֆիքինգի և շահագործման դեպքերի բացահայտման գործում նշանակալի է։

Նախարարության մարդկանց թրաֆիքինգի և կանանց հիմնահարցերի բաժնի պետ Սոֆի Բոստանչյանը հանդիպման մասնակիցներին ներկայացրել է ՀՀ-ում 2023-2025թթ․ ընթացքում մարդկանց թրաֆիքինգի կամ շահագործման դեմ պայքարի կազմակերպման ազգային ծրագրի 2024 թ․ հաշվետվությունը։ Ըստ բանախոսի՝ Հայաստանի Հանրապետությունն իր ստանձնած միջազգային պարտավորությունների շրջանակում որդեգրել է մարդկանց թրաֆիքինգի դեմ պայքարի համակարգային մոտեցում, որը ներառում է կանխարգելում, զոհերի և հավանական զոհերի պաշտպանություն և աջակցություն, քրեական հետապնդում, զոհերի պաշտպանություն և բազմակողմանի համագործակցություն։

Վերջինս մանրամասնորեն խոսել է գործողությունների ազգային ծրագրի 7 գերակայությունների մասին, դրանց շրջանակում իրականացված աշախտանքների և հետագա անելիքների մասին։ Մասնավորապես՝ ոլորտի օրենսդրական դաշտի փոփոխությունների, կարիքի գնահատման հիման վրա տրվող աջակցության տեսակների, հանրային իրազեկման աշխատանքների, հաստատված մեթոդաբանությամբ և ուղեցույցով առաջնային օղակի մասնագետների վերապատրաստումների, երեխաների թրաֆիքինգի կանխարգելման և այլ հարցերի շուրջ։

«Սեռական բռնության ճգնաժամային կենտրոն» հկ-ի նախագահ Տաթևիկ Աղաբաբյանը ներկայացրել է է 2024թ․ ընթացքում մարդկանց թրաֆիքինգի զոհերին և հավանական զոհերին տրամադրված աջակցության տեսակները, ինչպես նաև թրաֆիքինգի և շահագործման, սեռական բռնության ենթարկված անձանց սոցիալ-հոգեբանական վերականգնողական ծառայությունները։

Հանդիպման ընթացքում քննարկվել է նաև Եվրոպայի խորհրդի մարդկանց թրաֆիքինգի դեմ պայքարի հարցերով փորձագիտական խմբի (GRETA) Հայաստան այցի կազմակերպման աշխատանքները, երկուստեք հետաքրքրող հարցերի շրջանակը։