Ապագան այսօրն է, այսօր սկսիր լինել այնպիսին, ինչպիսին ուզում ես լինել ապագայում. Փաշինյան

Տեղի է ունեցել Իրական Հայաստանի գաղափարախոսության նախագծի երկրորդ քննարկումը:

Անդրադառնալով Իրական Հայաստանի գաղափարախոսությանը՝ վարչապետ Նիկոլ Փաշինյանն ասել է.

«Հայաստանի Հանրապետությունը հենման կետ չէ ուրիշ երկրի մասին երազելու համար, Հայաստանի Հանրապետությունը հենց այն երկիրն է, որը ունենալով, զարգացնելով՝ մենք պետք է արձանագրենք, որ հասել ենք մեր երազանքին»։

Վարչապետի խոսքերով՝ Իրական Հայաստանի գաղափարախոսությունը առաջարկում է, որ ապագայի մասին մեր պատկերացումները փոխենք։

«Մենք միշտ կամ հաճախ, կամ երբեմն ապագան ընկալում ենք որպես հեռու մի բան, բայց իրականում ապագան հեռու բան չէ, ապագան կախված է այսօրվա մեր գործողություններից։

Երբ ապագան ընկալում ես հեռավոր մի բան, մտածում ես, որ դրան ուղղված գործողությունը կարելի է անել նաև վաղը, մյուս օրը, ավելի լավ ժամանակներ լինեն, ավելի լավ պայմաններ լինեն, ավելի լավ միջավայր լինի, ավելի բարենպաստ մթնոլորտ լինի։

Պետք է դու գործողություն անես, որ ապագան լինի ավելի լավը։ Այս կարգախոսով ուզում եմ ամփոփել, որը արձանագրում է՝ «Ապագան այսօրն է, այսօր սկսիր լինել այնպիսին, ինչպիսին ուզում ես լինել ապագայում»։ Այսինքն՝ սա անհատի մասին է, սա հանրության մասին է, սա պետության մասին է, և շատ կարևոր է, որ ապագայի նկատմամբ այդ վերաբերմունքը փոխվի, որովհետև մենք միշտ այսօրվա դառնության հաղթահարումը, այսօրվա պրոբլեմի հաղթահարումը կապում ենք ապագայում բացվելիք հնարավորության հետ։

Այստեղ խնդիրն այն է, որ այդ հնարավորությունը այսօր է, նույնիսկ եթե այսօր այդ հնարավորություն չկա, պետք է աշխատենք այդ հնարավորությունը բացելու վրա»,- խոսքը եզրափակել է վարչապետը։

Իրական Հայաստանի գաղափարախոսության նախագծին մասնակցելու համար կարող եք գրել [email protected] էլ փոստին։