Աննա Վարդապետյանի դեմ հերթական դատական հայցն է ներկայացվել

Գլխավոր դատախազ Աննա Վարդապետյանի դեմ հերթական հայցադիմումն է ներկայացվել դատարան: Այս մասին NEWS.am-ը տեղեկացավ՝ ուսումնասիրելով դատական տեղեկատվական համակարգում հրապարակված տվյալները: Մասնավորապես Էրեբունի և Նուբարաշեն վարչական շրջանի դատախազության դատախազ Արտակ Հովհաննիսյանը, որը գլխավոր դատախազի՝ 2025 թվականի հունվարի 31-ի հրամանով ազատվել է պաշտոնից, դիմել է Երևանի քաղաքացիական դատարան՝ պահանջելով անվավեր ճանաչել ՀՀ գլխավոր դատախազի՝ իր նկատմամբ կարգապահական տույժ նշանակելու որոշումը, պաշտոնից ազատելու հրամանը, ինչպես նաև բռնագանձել հարկադիր պարապուրդի ամբողջ ժամակահատվածի համար միջին աշխատավարձը և վերականգնել նախկին աշխատանքում: Երևան քաղաքի առաջին ատյանի ընդհանուր իրավասության քաղաքացիական դատարանը՝ նախագահությամբ դատավոր Մ.Ստեփանյանի, մարտի 3-ին հայցադիմումն ընդունել է վարույթ:

Դատարանը պատասխանող ՀՀ գլխավոր դատախազությունից պահանջել մեկշաբաթյա ժամկետում դատարանին տրամադրել վիճարկվող անիրավական ակտի հիմքում ընկած փաստերը հաստատող ապացույցները, դատախազին ծառայությունից ազատելու և կարգապահական պատասխանատվության ենթարկելու հետ կապված վեճի հետ կապված՝ պատասխանողի տիրապետման տակ գտնվող բոլոր ապացույցները:

Նշենք, որ Արտակ Հովհաննիսյանը Աննա Վարդապետյանի հրամանով Երևան քաղաքի Էրեբունի և Նուբարաշեն վարչական շրջանների դատախազության դատախազի պաշտոնին էր նշանակվել 2023 թվականի նոյեմբերի 16-ին:

Դատախազութան կայքում հրապարակված տվյալների համաձայն՝ գլխավոր դատախազ Աննա Վարդապետյանի՝ 2025 թվականի հունվարի 7-ի որոշման հիման վրա՝ Երևան քաղաքի Էրեբունի և Նուբարաշեն վարչական շրջանի դատախազությունում ինքնավար պաշտոն զբաղեցնող անձի նկատմամբ հարուցվել է կարգապահական վարույթ: Վարույթի շրջանակում հաստատվել է, որ Արտակ Հովհաննիսյանը պարբերաբար խախտել է աշխատանքային ներքին կարգապահական կանոնները, դատախազի վարքագծի կանոնները և չի կատարել իր պաշտոնեական պարտականությունները, մասնավորապես՝ առանց որևէ իրավական հիմքի՝ երկու աշխատանքային օր չի ներկայացել աշխատանքի:

Էթիկայի հանձնաժողովը 2025 թվականի հունվարի 30-ի որոշմամբ հաստատված է համարել կարգապահական խախտման առկայությունը և դատախազի մեղավորությունը և գլխավոր դատախազի՝ 2025 թվականի հունվարի 31-ի որոշմամբ՝ Հովհաննիսյանի նկատմամբ նշանակվել է «պաշտոնից ազատում» տեսակի կարգապահական տույժ: Նույն օրը գլխավոր դատախազի հրամանով՝ Երևան քաղաքի Էրեբունի և Նուբարաշեն վարչական շրջանի դատախազության դատախազն ազատվել է պաշտոնից:

Նշենք, որ ներկայումս Աննա Վարդեպետյանի և գլխավոր դատախազության դեմ մի քանի տասնյակ հայցադիմումներ են քննվում դատարաններում: