ԱԶԲ տնօրենի հետ քննարկվել է Դիլիջանի և Պուշկինի թունելների վերակառուցման հնարավորությունը

ՀՀ տարածքային կառավարման և ենթակառուցվածքների փոխնախարարներ Քրիստինե Ղալեչյանն ու Վարդան Կոստանյանն ընդունել են Ասիական զարգացման բանկի Կենտրոնական և Արևմտյան Ասիայի վարչության գլխավոր տնօրեն Եվգենի Ժուկովին և Հայաստանում ԱԶԲ առաքելության մշտական տնօրեն Դոն Լամբերտին։ Այս մասին տեղեկացնում են ՏԿԵ նախարարությունից:

Փոխնախարարները ողջունել են հյուրերին, կարևորել ԱԶԲ-ի հետ երկարամյա արդյունավետ համագործակցությունն ու այդ շրջանակում իրականացվող ծրագրերը՝ ընդգծելով, որ դրանք զգալի ազդեցություն ունեն Հայաստանի ենթակառուցվածքների զարգացման վրա։ Նրանք շնորհակալություն են հայտնել ԱԶԲ-ին՝ Հայաստանի տարբեր ոլորտներում ներդրումներ իրականացնելու և երկկողմ համագործակցությունը շարունակաբար ընդլայնելու համար։

Կողմերը կարևորել են ԱԶԲ-ի ներդրումները ճանապարհաշինության, էներգետիկայի և ջրային ռեսուրսների կառավարման ոլորտներում՝ ընդգծելով համատեղ ծրագրերի շարունակականության անհրաժեշտությունը։

Հանդիպման ընթացքում քննարկվել են Ասիական զարգացման բանկի հետ համագործակցության ընթացիկ ծրագրերը, դրանց արդյունավետության բարձրացման ուղիները, ինչպես նաև հնարավոր նոր նախաձեռնությունները՝ ուղղված Հայաստանի ենթակառուցվածքների զարգացմանը։

Կողմերը քննարկել են նաև համատեղ իրականացվող մի շարք ծրագրեր, այդ թվում՝ Դիլիջանի և Պուշկինի թունելների վերակառուցման հնարավորությունը, Մ6 միջպետական ճանապարհի՝ նախորդ տարվա մայիսյան ջրհեղեղներից վնասված հատվածների վերակառուցման հարցերը։

Անդրադարձ է կատարվել նաև Հայաստանում իրականացվող ջրամբարաշինության ծրագրերին և այդ ուղղությամբ կողմերի միջև համագործակցության խորացման հեռանկարներին։