Ադրբեջանն ընդդեմ Հայաստանի դաշնակիցներ է ձեռք բերում. Ստեփան Դանիելյան

ԵՄ դիտորդներն ապահովում են Եվրոպայի ներկայությունը Հարավային Կովկասում, որպեսզի նա նույնպես ներգրավվի մեծ խաղաղության պայմանագրի ստորագրման գործընթացում, քանի որ այս տարածաշրջանով են անցնելու ամենակարևոր հաղորդակցությունները, ինչը աշխարհակարգի ձևավորման առումով կարևորագույն գործոն է։

Դրա մասին NEWS.am-ի թղթակցի հետ զրույցում նշել է քաղաքագետ Ստեփան Դանիելյանը։

«Միևնույն ժամանակ Իրանը, Ռուսաստանը, Թուրքիան և Ադրբեջանը պահանջում են դուրս բերել եվրոպացի դիտորդներին։ Այսինքն՝ Բաքուն պահանջ է առաջ քաշել, որին աջակցում են տարածաշրջանի այլ երկրներ։ Ստացվում է, որ Ադրբեջանը դաշնակիցներ է ձեռք բերում ընդդեմ Հայաստանի։ Իսկ ո՞ւմ վրա է հույսը դնում Հայաստանը: ԵՄ-ն այս տարածաշրջանում իրադարձությունների զարգացման վրա չի կարող իրական ռազմական ազդեցություն ունենալ»,- նշել է նա։

Փորձագետը նշել է, որ Ադրբեջանը շտապում է, քանի որ հասկանում է, որ կարող է կորցնել իր գերիշխող դերը տարածաշրջանում։

«Եթե ԱՄՆ-ն ու Ռուսաստանը համաձայնության գան, և համաձայնություն ձեռք բերվի, որը երաշխավորում է, որ ԱՄՆ-ը կհրաժարվիի Իրանի դեմ ռազմական գործողություններից, ապա դա կուժեղացնի Թեհրանի և Մոսկվայի ազդեցությունը Հարավային Կովկասում և կհանգեցնի Թուրքիայի ազդեցության թուլացմանը։

Դրանից հետո Բաքուն այլևս չի կարողանա անել այն, ինչ անում է հիմա։ Այս պայմաններում Հայաստանի տարածքով միջանցքի բացումը Թուրքիայի հետ ցամաքային կապեր հաստատելու առումով Ադրբեջանի համար կենսական նշանակություն ունի»,- ընդգծել է նա։

Ըստ քաղաքագետի՝ Ռուսաստանը ցանկանում է վերահսկել ճանապարհը հենց Սյունիքով, իսկ Իրանն առհասարակ չի ցանկանում այս ճանապարհը, բայց եթե այլ տարբերակներ չկան, Թեհրանում կարծում են, որ այդ ճանապարհը պետք է Մոսկվան վերահսկի։