1 զոհ, 3 վիրավոր․ ուկրաինական ԱԹՍ-ների զանգվածային հարձակում՝ Մոսկվայի և Մերձմոսկովյան շրջանների վրա

Մոսկվայի և Մերձմոսկովյան շրջանների վրա ուկրաինական անօդաչու թռչող սարքի հարձակման հետևանքով մեկ մարդ է զոհվել, երեքը` վիրավորվել: Այս մասին տելեգրամյան ալիքում հայտնել է Մոսկվայի շրջանի նահանգապետ Անդրեյ Վորոբյովը։

«Այսօր առավոտյան ժամը 4-ին, անօդաչու թռչող սարքի զանգվածային հարձակում է սկսվել Մոսկվայի և Մերձմոսկովյան շրջանի վրա: Այս պահին հայտնի է, որ մեկ մարդ մահացել է, երեքը վիրավորվել են Լենինսկի քաղաքային թաղամասում (Վիդնոյե քաղաք) և Դոմոդեդովոյում (Յամ գյուղում)»,- «ՌԻԱ Նովոստի»-ի փոխանցմամբ՝ գրել է նա։

Վորոբյովը մանրամասնել է, որ անօդաչու թռչող սարքի բեկորներն ընկել են Ռամենսկի շրջանում գտնվող բնակելի շենքի վրա, որտեղ վնասվել է Սեվերնոյե Շոսսեի շենքի 19-ից 22-րդ հարկերի առնվազն յոթ բնակարան։ Նշված բնակարաններից 12 մարդ տարհանվել է, այդ թվում՝ երեք երեխա։ Նրանցից մի քանիսին տեղավորել են հարևան գիմնազիայում, մյուսներն այժմ բնակվում են հարազատների մոտ։

Բժիշկները տուժածներին տեղում օգնություն են ցուցաբերել։ Այնտեղ աշխատում են նաև շտապօգնության բոլոր ծառայությունները։

Երեքշաբթի վաղ առավոտյան Մոսկվայի քաղաքապետ Սերգեյ Սոբյանինը հայտնել է, որ հակաօդային պաշտպանության ուժերը ոչնչացրել են մայրաքաղաքի ուղղությամբ թռչող 69 անօդաչու թռչող սարքեր։

Ուկրաինայի զինված ուժերը փորձել են հարձակումների մի քանի ալիքներ իրականացնել՝ քաղաք ուղարկելով մեկից մի քանի անօդաչու թռչող սարքեր։ Հակառակորդի անօդաչու թռչող սարքի ոչնչացման մասին առաջին տեղեկությունը ստացվել է առավոտյան ժամը 04:35-ին։

Խոցված դրոնի բեկորների ընկնելու հետևանքով վնասվել է նաև Մոսկվայի Դոմոդեդովսկայա փողոցում գտնվող տան տանիքը: Դոմոդեդովոյում հրդեհ է բռնկվել նաև «Միրատորգա» կայանատեղիում, տեղում աշխատում են փրկարարները:

Բացի այդ, Ինչպես հայտնել են «Ռոսավիացիայից», «Դոմոդեդովո», «Շերեմետևո», «Վնուկովո» և «Ժուկովսկի» օդանավակայաններում սահմանափակումներ են մտցվել ինքնաթիռների ընդունման և թողարկման համար:

Միաժամանակ ժամանակավորապես դադարեցվել է նաև «Դոմոդեդովո» երկաթուղային կայարանով գնացքների երթևեկությունը երկու ուղղություններով։

Ուկրաինայի զինված ուժերը գրեթե ամեն օր փորձում են անօդաչուներով հարձակվել Ռուսաստանի սահմանամերձ և կենտրոնական շրջանների օբյեկտների վրա։ ՀՕՊ ուժերը հաջողությամբ խափանում են հակառակորդի թռչող սարքերը։